Пабываць на галоўнай ёлцы краіны ў Мінску — запаветная мара кожнага дзіцяці.
Сёлета на навагоднім свяце ў Палацы Рэспублікі разам з іншымі дзецьмі з розных рэгіёнаў Беларусі пабывалі і прадстаўнікі Кіраўшчыны — вучаніцы СШ №1 Дар’я Ананіч і Крысціна Ётвеш, гімназістка Ксенія Русецкая і Максім Няйштэтар з Паўлавіцкай СШ імя Р.А.Худалеева.
Па традыцыі, з надыходзячым Новым годам усіх удзельнікаў дабрачыннага свята ў межах акцыі “Нашы дзеці” павіншаваў Прэзідэнт Беларусі Аляксандр Лукашэнка і адзначыў, што ў нашай краіне ствараюцца ўсе ўмовы, каб дзеці маглі раскрыць свае здольнасці і таленты. Кіраўнік дзяржавы заклікаў рабят любіць сваю Радзіму, цаніць мір і бяспеку, цвёрда ісці да пастаўленай мэты, пераадольваючы цяжкасці, з аптымізмам глядзець у будучыню і верыць у лепшае.
Затым увазе рабят быў прапанаваны аўтарскі мюзікл “Крыштальная мелодыя”.
Дамоў удзельнікі навагодняга прадстаўлення вярнуліся не толькі з падарункамі, але і з багажом эмоцый.

У абласным цэнтры творчасці на Навагоднюю ёлку, па традыцыі, сабраліся выдатнікі вучобы, пераможцы алімпіяд, конкурсаў і спаборніцтваў, актывісты раённых мерапрыемстваў, а таксама дзеці-інваліды, дзеці-сіроты і дзеці, застаўшыеся без апекі бацькоў, хлопчыкі і дзяўчынкі з мнагадзетных і малазабяспечаных сем’яў ва ўзросце ад 8 да 14 гадоў.
Сярод удзельнікаў святочнага мерапрыемства былі і рабяты з нашага раёна: Аляксандр Бярозка, Ігар Шчоткін і Станіслаў Эзрын з СШ №1, Таццяна Садоўнікава і Аліна Пацягова з гімназіі горада, Канстанцін Бегуноў з Мышкавіцкай СШ, Аліна Ермалаева і Анастасія Котава з Паўлавіцкай СШ імя Р.А.Худалеева, Ратмір Клімаў з Дабаснянскага НПК ДС-СШ, Аляксандр Яраш з Баравіцкай СШ і Аліна Кукрэш з Жыліцкай СШ.
Усіх прысутных з навагоднімі святамі павіншаваў старшыня Магілёўскага аблвыканкама Уладзімір Даманеўскі і выказаў надзею на тое, што сённяшнія вучні, якія паказваюць выдатныя вынікі ў вучобе, спорце, у недалёкім будучым будуць прыносіць карысць роднай краіне, мэтанакіравана і адказна працуючы дзеля яе далейшага развіцця і працвітання.
Затым каля зялёнай прыгажуні-ёлкі адбылося навагодняе прадстаўленне, дзе рабяты весяліліся разам з Дзедам Марозам і Снягуркай, іншымі казачнымі персанажамі.
Да ўвагі дзятвы таксама была пранавана навагодняя казка-мюзікл “Шчаўкунчык і Мышыны кароль”. Завяршальным акордам свята быў вялізны торт ад губернатара, якім пачаставалі ўсіх прысутных. Удзельнікі губернатарскай ёлкі атрымалі 2-кілаграмовыя салодкія наборы.