Кіраўскі раён, як адміністрацыйная адзінка, быў утвораны 12 лютага 1935 года. З гэтага моманту пачаўся працоўны і гераічны летапіс нашага краю, у які ўпісаны слаўныя вехі развіцця Кіраўшчыны.
Раён ганарыцца героямі, якія праславіліся сваімі подзвігамі ў гады Вялікай Айчыннай вайны. У іх гонар названы вуліцы горада, дарослыя і дзеці ведаюць і памятаюць людзей, якія, не шкадуючы свайго жыцця, здабывалі нашу агульную Перамогу.
І сёння многія кіраўчане добрасумленнай працай, адказным стаўленнем да сваёй справы ўслаўляюць малую радзіму, прымнажаюць яе дабрабыт.
Па шэрагу паказчыкаў сельскагаспадарчай і іншых галін вытворчасці мы штогод займаем лідзіруючыя пазіцыі сярод іншых раёнаў вобласці і рэспублікі, значная заслуга ў гэтым руплівых працаўнікоў Кіраўшчыны.
У мінулым годзе рады слаўных сыноў сваёй зямлі, чыя плённая праца і асабісты ўклад у дасягненне важкіх паказчыкаў былі ўдастоены высокіх дзяржаўных узнагарод, папоўнілі чацвёра нашых землякоў. Ордэнам Пашаны адзначаны дырэктар ААТ “Рассвет” імя К.П.Арлоўскага Аляксандр Багель і трактарыст-машыніст ААТ “Кіраўскае райаграпрамтэхзабеспячэнне” Уладзімір Комар. Ганаровага звання “Заслужаны работнік сельскай гаспадаркі Рэспублікі Беларусь” удастоены трактарыст-машыніст ААТ “Рассвет імя К.П.Арлоўскага” Мікалай Белакурскі, медалём «За працоўныя заслугі» ўзнагароджана аператар машыннага даення кароў СГФ «Чыгірынка» РУП «Беларуснафта-Магілёўаблнафтапрадукт» Аксана Брага.
Сваімі перамогамі ў алімпіядах па вучэбных прадметах, творчых конкурсах і спартыўных спаборніцтвах розных узроўняў праслаўляюць родны раён падрастаючае пакаленне, моладзь.
Кіраўшчына – наш любімы край! І мы сваімі добрасумленнымі адносінамі да даручанай справы здольныя зрабіць яго самым прыгожым і квітнеючым!