Добрасумленны чалавек, зацікаўлены ў паспяховым будучым сваёй сям’і, дзяцей і дзяржавы ў цэлым, так ці інакш разважае над важнымі пытаннямі — прыросце насельніцтва краіны, залежнасці жыцця ад сацыяльна-эканамічных і прыродных умоў, міграцыі, адным словам, — дэмаграфічнымі. Абмяркоўваецца гэта на дзяржаўным узроўні, у сямейным коле, на Інтэрнэт-форумах. Адна з карыстальніц сацыяльных сетак дзеліцца меркаваннямі: “Мая бабуля перажыла рэвалюцыю, некалькі войнаў, жорсткі голад, працавала да 86 гадоў і памерла ва ўзросце 102 гады. Жыла без злосці на людзей, з Богам у душы. У матулі таксама жыццё было цяжкім, зараз ёй 93, і здароўе неблагое, да ўрачоў звяртаецца рэдка. А вось мужчынам чамусьці складаней дажыць да столькіх гадоў і захаваць здароўе…”; яе субяседнік працягвае думку: “Згодны з вамі! Нашых мужчын губіць у першую чаргу не клімат, не адсталая медыцына, а абыякавасць да свайго ладу жыцця і здароўя, а таксама ўжыванне спіртнога, а зараз яшчэ і розных відаў наркотыкаў”.

Абмеркаванне дэмаграфічнага пытання і таксама з акцэнтам на ўвагу да прадстаўнікоў моцнай паловы чалавецтва вялося і падчас чарговага пасяджэння камісіі па дэмаграфічнай бяспецы і здаровым ладзе жыцця насельніцтва нашага раёна. Справа ў тым, што, згодна інфармацыі аб дэмаграфічнай сітуацыі на Кіраўшчыне ў бягучым годзе (за 9 месяцаў), даведзенай падчас пасяджэння намеснікам галоўнага ўрача райбальніцы Жаннай Афонькінай, сярод жыхароў раёна, якія паміраюць у працаздольным узросце, больш за ўсё менавіта мужчын — 43, жанчын — 8. Сярод памёршых ва ўзросце 80 гадоў і старэй: мужчын — 36, жанчын — 110. Гэтыя лічбы красамоўна сведчаць аб тым, што прадстаўнікам моцнай паловы чалавецтва — час сур’ёзна задумацца. На гэта ўдзельнікаў пасяджэння прасіла звярнуць сур’ёзную ўвагу старшыня камісіі, намеснік старшыні райвыканкама Таццяна Бяляўская.
Усяго ў бягучым годзе памерла 323 жыхары раёна, што на 26 чалавек больш, чым летась. Нарадзілася 246 немаўлят (у 2015 годзе — 236).
Больш усяго жыхары Кіраўшчыны паміраюць па прычыне хранічнай недастатковасці кровазвароту — 216 чалавек (у 2015 годзе — 184). На другім месцы сярод прычын смяротнасці — анкалагічныя захворванні — 29 выпадкаў, на трэцім — дэгенерацыя галаўнога мозгу — 16.
Жыхары раёна ў працаздольным узросце паміраюць часцей за ўсё па прычыне анкалагічных захворванняў — 14 выпадкаў, а таксама з-за хранічнай недастатковасці кровазвароту і суіцыдаў.
Зыходзячы з аналізу статыстычных дадзеных, выходзіць, што сярод пацыентаў з анкалогіяй шмат выпадкаў захворвання на рак лёгкіх і прастаты, а значыць, і тут — у групе рызыкі мужчыны. Да таго ж, сярод загінуўшых у выніку суіцыдаў — таксама прадстаўнікі моцнай паловы чалавецтва. У адрозненні ад жанчын, якія ў асноўным здзяйсняюць так званыя паказальныя суіцыды праз атручванне альбо парэзы, якія, на шчасце, заканчваюцца захаваннем жыцця, мужчыны выбіраюць больш “надзейны” спосаб звесці лікі з жыццём —
павешанне, калі ў медыкаў мінімум шанцаў выратаваць чалавека.
Па дадзеных, прыведзеных урачом-псіхіятрам райбальніцы Таццянай Цімафеевай, сёлета ўчынена 11 суіцыдаў. Сярод самагубцаў — 9 чалавек працаздольнага ўзросту, 6 з якіх нідзе не працавалі, 2 — пенсіянеры. Сярод прычын, падштурхнуўшых жыхароў раёна на гэты крок, — у асноўным непаразуменне з членамі сям’і і сацыяльна-бытавая неўладкаванасць. Усе павешаныя працаздольнага ўзросту на момант учынення самагубства былі нецвярозымі.
Падчас абмеркавання сітуацыі з суіцыдамі на Кіраўшчыне, Таццяна Бяляўская абагульніла, што ў гэтым пытанні — адзін у полі не воін — супрацоўнікам райбальніцы, псіхолагам і іншым зацікаўленым структурам, у тым ліку рэлігійным арганізацыям, варта наладзіць цеснае ўзаемадзеянне паміж сабой з мэтай вылучэння групы людзей, схільных да самагубства, і наладжваць з кожным такім чалавекам індывідуальную работу, далучаючы да гэтага членаў сем’яў, сяброў і знаёмых. Варта дакладна адслежваць паводзіны такіх людзей у соцыуме, асаблівую ўвагу звяртаць на дзяцей, кантраляваць іх зносіны ў Інтэрнэт-асяроддзі.
Жанна Афонькіна, падводзячы вынікі аналізу дадзеных, зрабіла вывад, што ў адыходзячым годзе дэмаграфічная сітуацыя ў нашым раёне характарызуецца ростам агульнай смяротнасці і стабілізацыяй смяротнасці ў працаздольным узросце. 45% ад памёршых — асобы старэй за 80 гадоў, па прычыне старасці. У бягучым годзе памерла трое жыхароў раёна ва ўзросце старэй за 100 гадоў.
Падчас пасяджэння былі таксама заслуханы старшыня Дабаснянскага сельвыканкама Галіна Шчур і ўпраўляючы справамі Любоніцкага сельскага Савета дэпутатаў Святлана Мелех наконт узаемадзеяння гэтых сельвыканкамаў з установамі культуры, адукацыі, фізічнай культуры, спорту і турызму, аховы здароўя па арганізацыі культурнай дзейнасці, адпачынку і здаровага ладу жыцця.
Яўгенія БЯЛЬКО.