У пачатку года ў Кіраўску быў адкрыты дзіцячы дом сямейнага тыпу Алы і Дзмітрыя Перавознікавых. У вялікім, камфортным, добраўпарадкаваным і прыгожым доме ў каханні і згодзе пражывае дружная сям’я, у якой выхоўваюцца двое родных і чацвёра прыёмных дзяцей. Старэйшая родная дачка Дар’я – студэнтка другого курса Акадэміі кіравання пры Прэзідэнце Рэспублікі Беларусь, Арыне – 13 гадоў. Сярод прыёмных: Карыне споўнілася 17, Уладзіславу – 13. Пестуюць бацькі і старэйшыя дзеці самых маленькіх брацікаў: трохгадовага Івана і Кірыла, якому літаральна праз некалькі дзён, 3 студзеня, споўніцца два годзікі. Усе дзеці ў поўнай меры ахутаны пяшчотай і любоўю, нягледзячы на розны ўзрост і адметнасці характараў.

Напярэдадні Новага года кожны з нас чакае цудаў і сюрпрызаў. Учора сапраўдным сюрпрызам для сям’і Перавознікавых стаў візіт старшыні раённага выканаўчага камітэта Галіны Слабоднікавай. Кіраўнік раёна завітала з навагоднімі віншаваннямі і, вядома ж, не з пустымі рукамі. Кожны з дзяцей атрымаў цудоўныя падарункі, у тым ліку і салодкія, а для ўсёй сям’і сюрпрызам ад райвыканкама стала маразільная камера, якая значна аблегчыць быт.

Шчаслівае сямейства запрасіла ганаровую госцю да стала, дзе за кубкам чаю з салодкасцямі адбылася душэўная гутарка. А перад развітаннем усе разам зрабілі фотаздымак на памяць.