Імя Аліны Станіславаўны Якавенка добра вядомае ў творчым асяроддзі нашага раёна і нават за яго межамі. А, дакладней, яе шматлікія работы: карціны, вырабы з саломапляцення і іншых матэрыялаў. Настаўнік выяўленчага накірунку дзейнасці дзіцячай школы мастацтваў г.Кіраўска — адзіная ў раёне член Саюза майстроў народнай творчасці.

2019-ты ў прафесійнай дзейнасці Аліны Станіславаўны — юбілейны. 35 год яна займаецца любімай справай, якая стала прызваннем — вучыць дзяцей тэхніцы выяўленчага мастацтва, развіваць ў іх эстэтыку і густ да прыгожага. За гэты час таленавіты педагог выхавала шмат творчых рабят, раскрыла і развіла іх здольнасці. Многія з яе выхаванцаў у розныя гады станавіліся пераможцамі і прызёрамі разнастайных конкурсаў, фестываляў, прычым не толькі раённых, а і абласных, рэспубліканскіх і нават міжнародных. Вікторыя Печань, якую вы бачыце на здымку разам са сваёй настаўніцай, — адна з лепшых сённяшніх вучаніц Аліны Якавенка.

Напрыканцы сакавіка бягучага года ў Магілёве прайшоў І рэгіянальны мастацкі конкурс “Майстэрня талентаў”. Удзел у ім прынялі і выхаванцы ДШМ г.Кіраўска пад кіраўніцтвам педагогаў Аліны Якавенка і Людмілы Каранкевіч. За званне пераможцы спрачаліся 72 юных мастака. Конкурс праходзіў у 2 этапы, па 4 акадэмічных гадзіны (малюнак, жывапіс). Пры высокай канкурэнцыі сапернікаў Вікторыя Печань у сваёй узроставай катэгорыі паказала выдатную падрыхтоўку і творчыя здольнасці. Яе малюнак-фантазія пад назвай “Мая маленькая радзіма” быў ацэнены журы дыпломам ІІ ступені. У якасці прыза кіраўчанцы была ўручана кніга пра мастацтва.

Як адзначыла А.С.Якавенка, Вікторыя — вельмі старанная вучаніца, якая крапатліва працуе над сваімі работамі. Любая справа, што датычыцца выяўленчага мастацтва, ёй па сілах. І гэта не першы поспех юнай мастачкі. Нядаўна Віка стала пераможцай Бабруйскага епархіяльнага этапа ХІV Міжнароднага рэгіянальнага конкурсу дзіцячага выяўленчага мастацтва “Прыгажосць Божага свету” ў другой узроставай групе. Былі ў дзяўчынкі і іншыя перамогі.

Творчасць Вікторыі не абмяжоўваецца маляваннем. Яна пераймае ў сваёй настаўніцы тэхніку пляцення з саломкі і робіць гэта на “выдатна”. Пажадаем дзяўчынцы яшчэ шмат творчых поспехаў!

Аляксандр ХАХЛОЎ.

Фота аўтара.