Сезон восеньскіх кірмашоў на Кіраўшчыне: старт дадзены!
У мінулую суботу быў дадзены старт правядзенню ў Кіраўску традыцыйных кірмашоў па продажу сельскагаспадарчай прадукцыі.
Вось ужо каторы год з надыходам восені сельскагаспадарчыя арганізацыі, прыватныя гандляры радуюць кіраўчан разнастайнай прадукцыяй па прымальных цэнах, і ва ўсіх гаспадароў ёсць цудоўная магчымасць на працягу некалькіх кірмашоў папоўніць запасамі падвалы, засекі, кладоўкі і клеці.
Першы сёлетні кірмаш, які быў арганізаваны на ўчастку вул.Ленінскай атрымаўся не самым масавым. Віной таму стала дажджлівае надвор’е: нябесная канцылярыя, якая адкрыла мокры “шлюз” у пятніцу, прадоўжыла паліваць і на наступны дзень. Па гэтай прычыне многія вырашылі адкласці пакупкі на наступныя кірмашы. Аднак шмат было і тых, каму не цярпелася набыць неабходную прадукцыю.
Гаспадаркі раёна, райспажыўтаварыства, Жыліцкі сельгаскаледж прапанавалі гараджанам тавар на любы густ: збожжа, бульбу, капусту, моркву, агуркі, таматы, сталовыя буракі, цыбулю, часнок, фасолю, журавіны, яблыкі, жывую рыбу. Асаблівым попытам у пакупнікоў, якія утрымліваюць хатнюю жывёлу і птушку, карысталася зерне: некаторыя набывалі яго па некалькі мяхоў.
Жадаючыя маглі звярнуцца за паслугамі транспарту райспажыўтаварыства, каб даставіць цяжкія пакупкі дадому.
Пачатак кірмашам дадзены: ёсць упэўненасць, што багаты выбар сельскагаспадарчай прадукцыі, вырашчанай на ўрадлівай кіраўскай зямлі, дазволіць усім жадаючым зрабіць запасы на зіму.
Подписывайтесь на нас в социальных сетях: «Одноклассники» и «Одноклассники» (группа), «ВКонтакте», «Фейсбук», «Instagram», «Telegram», «Яндекс Дзен».