У мінулы чацвер у ААТ «Рассвет імя К.П.Арлоўскага» завяршылася жніво. Па традыцыі, якая ўжо даўно замацавалася ў сельгасарганізацыі, хлебаробаў віншавалі з заканчэннем уборкі збожжавых і зернебабовых, з працоўнымі перамогамі.

Участак для віншаванняў “байцоў” хлебных палёў быў абраны каля ліпавай алеі побач з маладым садам і кукурузнымі пасевамі непадалёк ад Цейкавіч. І ў тым — свая сімвалічнасць: скончылі ўборку адных культур, наперадзе — наступныя.

Сімвалічны сноп з каласоў новага ўраджаю ад імя ўсіх хлебаробаў ўручылі дырэктару гаспадаркі Аляксандру Багелю лідары жніва-2018 (не толькі ў “Рассвеце”, а і на Кіраўшчыне ў цэлым) Мікалай Дрозд і яго сын Андрэй.

Аляксандр Багель, звяртаючыся да ўдзельнікаў уборачнай кампаніі, адзначыў высокую ступень гатоўнасці людзей да працы, мэтанакіраванасць і самаадданасць усіх работнікаў, якія былі задзейнічаны на жніве, а таксама тых, хто выконваў папярэднюю карпатлівую работу, каб ураджай атрымаўся як мага больш важкім. Усе, адзначыў Аляксандр Багель, — спецыялісты агранамічнай і інжынернай служб, механізатары, вадзіцелі, работнікі сушыльных гаспадарак, тыя, хто рыхтаваў смачныя стравы для хлебаробаў — стараліся, каб быў сабраны ўраджай. Чакаўся ён, зыходзячы з праведзеных папярэдніх работ і адпаведна ўкладзеных сродкаў, куды большым. Але і тое, што ў няпростых умовах вырашчана, патрабавала вялікіх намаганняў. З удзячнасцю за плённую працу ўсім, хто быў заняты на жніве, кіраўнік нізка пакланіўся.

Першы намеснік дырэктара “Рассвета” Аляксандр Жылінскі агучыў рэзультаты жніва ў сельгасарганізацыі. Валавы збор збожжавых і зернебабовых склаў 12270 т пры сярэдняй ураджайнасці 39 ц/га (вышэйшая ў раёне). Сярод камбайнераў першае месца заваявалі Мікалай і Андрэй Дразды, якія намалацілі на камбайне “Нью Холанд” 1680 т збожжа . Побач з флагманамі — Іван Салановіч і Аляксандр Кахновіч, Сяргей  Міхалькоў з Сяргеем Рыдзеўскім.

Духмяны каравай галоўнаму спецыялісту ўручыў лідар сярод вадзіцеляў па перавозцы збожжа ад камбайнаў Валерый Шчэрбіч, які перавез яго 2227 т. Дарэчы, у лік тых, хто перавез найбольшую колькасць зерня, заслужана трапілі Іван Барысёнак і Дзяніс Сакабіцкі.

Усім хлебаробам былі ўручаны караваі са збожжа новага ўраджаю — сімвал таго, што хлеб, які быў вырашчаны сіламі працаўнікоў палёў — гэта яшчэ і сямейная рэліквія: ад бацькі-хлебароба эстафета павінна перадавацца сыну, а жонка і дзеці наогул радуюцца працоўным дасягнення галавы сям’і!..

У адрас удзельнікаў жніва гучалі музычныя падарункі ў выкананні ўдзельнікаў народнага ансамбля “Мілавіца”. Свае нумары падрыхтавалі таксама маладыя вадзіцелі і камбайнеры “Рассвета”, і сваім выступленнем выклікалі дружныя апладысменты калег па цэху. А задаволенасць ад выкананых работ і віншаванняў бачылася ў вачах кожнага!..

Аднак, наперадзе яшчэ шмат работ. Даспявае кукуруза, агародніна… І з думкамі пра гэта рассветаўскія земляробы рушылі дадому. Назаўтра — зноў у “бой”!…

Аляксандр ХАХЛОЎ.

Фота аўтара.