Апошні званок – кранальнае і значнае свята, якое сімвалізуе завяршэнне школьнага этапа жыцця. Свята з ноткамі суму і слязамі на вачах, з думкамі, поўнымі планаў і надзей, што самае лепшае рабят чакае наперадзе. Пасталелыя выпускнікі развітваюцца з роднай школай, каб зрабіць першы крок у дарослае жыццё.

Свае віншаванні з заканчэннем навучальнага года адрасавала калектыву СШ №1 г.Кіраўска, вучням і іх бацькам старшыня райвыканкама Галіна Слабоднікава. Яна адзначыла, што сістэма адукацыі – важнейшы складальнік развіцця дзяржавы, асноўная задача якога – павышэнне якасці адукацыі пры захаванні і ўмацаванні здароўя вучняў, выхаванне грамадзяніна краіны. У раёне функцыянуе 11 устаноў агульнай сярэдняй адукацыі, у якіх навучаецца 1828 дзяцей.
Кіраўнік раёна нагадала, што ў гэтым годзе вучнямі і педагогамі ўстаноў адукацыі быў заваяваны 271 дыплом, з іх 102 міжнароднага, 52 рэспубліканскага і 117 абласнога ўзроўняў.

Са словамі віншаванняў з нагоды апошняга званка да вучняў і педагогаў звярнуўся дырэктар установы адукацыі Мікалай Казлоў. Ён адзначыў: «Дарагія выпускнікі, наперадзе ў вас няпросты выбар, ад якога залежыць ваша будучыня. Хочацца, каб вы яго зрабілі свядома і ніколі аб ім не пашкадавалі. Памятайце пра сваю малую радзіму, дзе вас заўсёды рады бачыць, у тым ліку і ў якасці будучых спецыялістаў устаноў і арганізацый раёна».
Словы падзякі ў адрас настаўнікаў, а таксама добрыя пажаданні выпускнікам выказала ад імя бацькоў Вікторыя Бяляўская.
Свята апошняга званка было напоўнена песнямі і танцамі, вершамі і віншаваннямі і, вядома ж, традыцыйным вальсам выпускнікоў, які закруціў у віхуры рабят, якія развіталіся ў гэты дзень са сваім дзяцінствам.
Звонкі залівісты званок у руках першаклашкі даў старт да новых вяршыняў, да надзей і ўзлётаў, новых магчымасцяў і мар.
У добры шлях, выпускнікі!

Подробно в номере № 41 (10663).

Людміла СЯМЁНАВА.
Фота аўтара.