Сустрэча з насельніцтвам адбылася ў аграгарадку Барчыцы
Чарговая сустрэча з насельніцтвам па пытаннях забеспячэння жыццядзейнасці адбылася ў аг.Барчыцы. Да мясцовых жыхароў завітала рабочая група на чале са старшынёй раённага выканаўчага камітэта Галінай Слабоднікавай.
Адкрываючы сустрэчу, Галіна Слабоднікава прадставіла прысутным новага намесніка дырэктара КСУП “Барчыцы-агра” Аляксандра Трафімава.
Тэма бяспекі жыццядзейнасці была і застаецца адной з галоўных падчас сустрэч з насельніцтвам. Начальнік раённага аддзела па надзвычайных сітуацыях Сяргей Собаль нагадаў прысутным аб захаванні правілаў пажарнай бяспекі, вядзення здаровага ладу жыцця, бо вялікую бяду прыносяць пажары, якія здараюцца з-за незахавання правілаў бяспекі па прычыне алкагольнага ап’янення. У сувязі з наступленнем вясны начальнік РАНС звярнуў асаблівую ўвагу на недапушчальнасць спальвання сухой расліннасці на караню, расказаў аб правілах спальвання смецця і рэшткаў раслін, а таксама падкрэсліў важнасць выкарыстання аўтаномных пажарных апавяшчальнікаў у жылых памяшканнях.
Паколькі сустрэча праходзіла ў перыяд пачатку веснавой палявой кампаніі, Галіна Сдабоднікава абазначыла асаблівую важнасць якаснага і своечасовага правядзення сельскагаспадарчых работ. У КСУП “Барчыцы-агра” для гэтага ёсць усё неабходнае: тэхніка, насенне, угнаенні. Галоўнае, адзначыла кіраўнік раёна, – дысцыпліна, адказнасць на месцах, захаванне тэхналагічных нормаў.
Тэму арганізацыі работ падчас палявой кампаніі прадоўжыў старшыня раённай прафсаюзнай арганізацыі беларускага прафсаюза работнікаў АПК Віктар Ставер. Ён адзначыў, што ў “Барчыцы-агра” шмат зроблена па стварэнні вытворчых і бытавых умоў для работнікаў. Няма праблем з забеспячэннем спецвопраткай. Як станоўчы момант прагучаў той факт, што ў гаспадарцы захавана сталоўка для кармлення работнікаў, зараз яна даводзіцца да ладу – запусціць аб’ект у дзеянне плануецца да перыяду корманарыхтоўкі і ўборкі ураджаю.
Першы намеснік старшыні – начальнік упраўлення па сельскай гаспадарцы і харчаванні райвыканкама Аляксандр Кісялёў назваў асобныя паказчыкі сельгасарганізацыі па выніках мінулага года, па якіх назіраецца станоўчая дынаміка ў параўнанні з годам папярэднім. Аднак, як было адзначана, ў параўнанні з сярэднераённымі паказчыкамі “Барчыцы-агра” істотна адстаюць. Гаспадарцы аказваецца значная дзяржаўная падтрымка, паступае новая тэхніка. Таму перад калектывам пастаўлены задачы нарошчваць аб’ёмы вытворчасці.
Затым удзельнікі сустрэчы перайшлі да абмеркавання пытанняў жыццядзейнасці.Папярэджваючы шэраг з іх адносна патрабуемага рамонту дарог у населеных пунктах Скрыпліцкага сельсавета старшыня райвыканкама паведаміла, што ў красавіку-маі бягучага года запланаваны рамонт дарог па вул. Маладзёжнай у Барчыцах, вул. Юбілейнай у Глыбокавічах і некаторых іншых. Як адзначыў дырэктар ДРСУ-197 Віталь Токараў, работы пачнуцца, як толькі будзе спрыяльным надвор’е.
Адно з пытанняў тычылася адсутнасці ў цэнтральнай райбальніцы афтальмолага і оталарынголага. Калі будуць арганізаваны прыёмы гэтых спецыялістаў? Галоўны ўрач райбальніцы Сяргей Бычэнка паясніў, што заяўка накіравана ў галоўнае ўпраўленне аховы здароўя Магілёўскага аблвыканкама. На дадзеным этапе кіраўніцтвам райбальніцы робяцца захады па запрашэнні на работу афтальмолага і оталарынголага з медустаноў Бабруйска.
Жыхарка Барчыц паскардзілася на той факт, што ў ЦРБ ёй не выдалі накіраванне на абследаванне да спецыяліста ў паліклініку Бабруйска, і жанчыне давялося наведваць урача на платнай аснове. Яе таксама цікавіла, як прайсці абследаванне ў дзіцячага афтальмолага. Галоўнаму ўрачу ЦРБ дадзена даручэнне правесці разбіральніцтва па ўказаным факце, арганізаваць прыём афтальмолага
1 раз на тыдзень на выязной аснове. Па другім пытанні Сяргею Бычэнку даручана інфармаваць насельніцтва праз раённую газету.
Яшчэ адна жыхарка Барчыц звярнулася ў праектны інстытут Магілёўгіпразем па пытанні аднаўлення межаў жылога дома. Прадпрыемства запрасіла праз аддзел землеўпарадкавання райвыканкама дакументы па адводу зямельнага ўчастка. Гэтыя дакументы не былі прадастаўлены, і пытанне знаходзіцца на разглядзе працяглы час. Разабрацца ў гэтай сітуацыі даручана кіраўніцтву землеўпарадкавальнай службы райвыканкама.
Паступіла скарга на запаволеную работу сеткі Інтэрнет у Барчыцах. Разабрацца па гэтым пытанні даручана начальніку Кіраўскага ўчастка электрасувязі.
Падчас сустрэчы прагучала інфармацыя аб нездавальняючым стане прыпыначнага пункта, які знаходзіцца насупраць Барчыцкай СШ: тут брудна, маюць месца выпадкі распіцця спіртных напояў, курэнне. Кіраўніцтву ДРСУ-197 дадзена даручэнне прывесці прыпыначны пункт у належны стан, а кіраўніцтву РАУС – правесці разбіральніцтва.
Намеснік начальніка аддзела аховы правапарадку і прафілактыкі РАУС Віталь Сідарэнка нагадаў прысутным аб павелічэнні выпадкаў кібермахлярства. Ён звярнуў увагу на тое, што ашуканцы дзейнічаюць вельмі вынаходліва, праз мабільную сувяць уціраючыся ў давер грамадзян, асабліва пажылых людзей, а затым шляхам падману завалодваюць іх грашовымі сродкамі. Таму неабходна быць вельмі пільнымі, каб не стаць ахвярамі махляроў.
Па рабоце іншых службаў, якія адказваюць за жыццядзейнасць насельніцтва, нараканняў і заўваг не паступала.
Аляксандр ХАХЛОЎ.
Фота аўтара.