Вечная памяцьза подзвіг і смеласць
Учора каля памятнага знака ў гонар воінаў-кіраўчан, якія выконвалі інтэрнацыянальны абавязак пры ліквідацыі лакальных канфліктаў, адбыўся мітынг-рэквіем, прысвечаны Дню памяці воінаў-інтэрнацыяналістаў і 35-годдзю з дня вываду савецкіх войск з Афганістана. У ім прынялі ўдзел старшыня райвыканкама Галіна Слабоднікава, старшыня раённага Савета дэпутатаў Алена Сакадынец, члены раённага выканаўчага камітэта, воіны-інтэрнацыяналісты, прадстаўнікі раённых структур грамадскіх аб’яднанняў, працоўных калектываў, моладзь, жыхары горада і раёна.
Да ўдзельнікаў мітынгу-рэквіему звярнулася старшыня райвыканкама Галіна Слабоднікава. Яна адзначыла, што гэты дзень аб’яднаў усіх, хто з баямі прайшоў па горных афганскіх дарогах, хто выканаў свой інтэрнацыянальны абавязак, каго не пашкадавала вайна, адабраўшы жыццё дарагіх і блізкіх людзей.
Па словах кіраўніка раёна, вайна ў Афганістане з’яўляецца адной з трагічных старонак нашай гісторыі. У свой час абмежаваны кантынгент савецкіх войск уводзіўся ў гэтую краіну з міратворчай місіяй, дзеля аказання дапамогі афганскаму народу. Удалечыні ад Радзімы савецкія воіны праявілі мужнасць, гераізм, высокую грамадзянскую адказнасць і свядомасць, вернасць ваеннай прысязе. Нашы суайчыннікі ваявалі ў Алжыры, Анголе, Афганістане, Бангладэш, Венгрыі, В’етнаме, Егіпце і іншых краінах. З 82 кіраўчан, якія прымалі ўдзел у лакальных канфліктах, траім землякам не наканавана было вярнуцца дадому жывымі.
Як адзначыла Галіна Паўлаўна, сёння, ва ўмовах новых выклікаў сучаснасці, наша дзяржава высока цэніць ролю воінаў-інтэрнацыяналістаў ва ўмацаванні згоды ў грамадстве, выхаванні падрастаючага пакалення ў духу парыятызму, стойкасці і самаахвярнага служэння Айчыне. У гэты дзень мы ўшаноўваем воінаў, самааддана вырашаўшых ускладзеныя на іх баявыя задачы, і схіляем галовы перад памяццю загінуўшых.
Начальнік адасобленай групы Кіраўскага раёна Бабруйскага аб’яднанага гарадскога ваеннага камісарыята Мікалай Маліноўскі адзначыў, што мінула 35 гадоў з дня вываду савецкіх войск з Афганістана, але падзеі тых гадоў і сёння адгукаюцца незагойным, вострым болем у сэрцах. Свята захоўваецца памяць пра загінуўшых воінаў-афганцаў.
Старшыня раённай арганізацыі грамадскага аб’яднання “Беларускі Саюз ветэранаў вайны ў Афганістане” Юрый Сафронаў падзякаваў прысутным на мітынгу-рэквіеме воінам-інтэрнацыяналістам за тое, што яны не перастаюць служыць Айчыне і сёння, працуючы, удзельнічаючы ў грамадскім жыцці раёна і патрыятычным выхаванні моладзі.
Не пакінуў нікога раўнадушным кранальны дыялог маці і яе загінуўшага сына, які ўвасобілі работнікі культуры і вучні СШ №1. Словы матулі прадэманстравалі боль і горыч тысяч людзей, якія не дачакаліся сваіх сыноў, братоў, каханых з той вайны…
Ціхія гукі метранома адлічылі мінуту маўчання, а прысутныя ўшанавалі памяць тых, хто не вярнуўся з афганскага пекла, і ўспомнілі загінуўшых землякоў, памёршых ад раненняў у пасляваенныя гады.
У гонар памяці аб загінуўшых да памятнага знака ўдзельнікі мітынгу-рэквіему ўсклалі вянкі і кветкі.
Людміла СЯМЁНАВА.