У сучасным свеце людзі прывыклі да таго, што пастаянна знаходзяцца “на сувязі”, маюць магчымасць у любы час сутак быць у курсе падзей, якія адбываюцца ў тым ці іншым кутку планеты. Тэлефанія, інтэрнэт, інтэрактыўнае тэлебачанне і іншыя крыніцы інфармацыі ўвайшлі ў наша жыццё, сталі чымсьці звычайным і паўсядзённым.

Часта мы нават не задумваемся, хто нам прадастаўляе гэтыя выгоды, а вось калі здараецца аварыйная сітуацыя ці якое-небудзь абсталяванне выходзіць са строю, а адразу спяшаемся за дапамогай да работнікаў участка электрасувязі. У нашым раёне адказваюць за бесперабойную работу прадастаўлення паслуг электрасувязі работнікі Кіраўскага ўчастка электрасувязі Асіповіцкага занальнага вузла электрасувязі Магілёўскага філіяла РУП “Белтэлекам”. Сярод такіх спецыялістаў – электрамеханік лінейных збудаванняў сувязі і абаненцкіх прылад Сяргей Белаглазаў і кабельшчык-спайшчык 5 разраду Аляксандр Дрозд.

Сяргей Белаглазаў у свой час скончыў Беларускую дзяржаўную акадэмію сувязі, дзе атрымаў спецыяльнасць “эксплуатацыя сетак і тэлекамунікацый”. Больш за 10 гадоў ён займаецца падключэннем і абслугоўваннем інтэрнэту, тэлебачання, працуе з оптавалакном, праводзіць мантаж відэакантролю, наладку сістэм і абсталявання. Па словах кіраўніцтва ўчастка электрасувязі, Сяргей Аляксандравіч умее знайсці падыход да людзей, садзейнічае прыцягненню новых абанентаў, праводзіць кансультацыі як для існуючых, так і патэнцыйных кліентаў паслуг электрасувязі, расказвае пра новыя акцыі і цікавыя прапановы ад РУП “Белтэлекам”.

23 гады працуе на ўчастку электрасувязі Аляксандр Дрозд. Сярод яго асноўных абавязкаў – рамонт падземных камунікацый, аднаўленне паслуг сувязі. У сваёй штодзённай працы ён імкнецца выка­наць пастаўленыя задачы як мага хутчэй, каб лініі электрасувязі працавалі бесперабойна, а абаненты атрымлівалі якасныя паслугі, хутка рэагуе на аварыйныя сітуацыі і ўхіляе непаладкі. Ён упэнены, што кожны работнік іх арганізацыі разумее ўсю адказнасць перад абанентамі і карыстальнікамі паслуг электрасувязі, таму выконвае свае абавязкі прафесійна і адказна.

Фота Людмілы СЯМЁНАВАЙ.
На здымку: Аляксандр Дрозд (злева) і Сяргей Белаглазаў вядуць абслугоўванне абсталявання відэакантролю.Фота Людмілы СЯМЁНАВАЙ.
На здымку: Аляксандр Дрозд (злева) і Сяргей Белаглазаў вядуць абслугоўванне абсталявання відэакантролю.