Жыхары Кіраўшчыны абмяркоўваюць Пасланне Прэзідэнта Рэспублікі Беларусь Аляксандра Лукашэнкі к беларускаму народу і Нацыянальнаму сходу.

Аляксандр СЕРАКОЎ, ветэран працы аграпрамысловага комплексу, намеснік старшыні Магілёўскага абласнога аграпрамысловага саюза, узнагароджаны ордэнам Пашаны, медалём “За працоўныя заслугі”, Ганаровы грамадзянін Кіраўскага раёна:

— Уважліва і з цікавасцю слухаў Пасланне Прэзідэнта нашай краіны. Мне, як аграрніку са стажам, безумоўна, у першую чаргу, перадаліся тыя пачуцці, з якімі Кіраўнік дзяржавы гаварыў пра сельскую гаспадарку. Адчуваецца пазіцыя чалавека, які не па чутках ведае ўсе бакі галіны, па-сапраўднаму “хварэе” душой за развіццё АПК і бачыць рэальныя накірункі гэтага.

Адпрацаваўшы шмат гадоў на кіруючай пасадзе сельгаспрадпрыемства, поўнасцю згодны з думкай, што асновай развіцця сельскай гаспадаркі з’яўляецца буйнатаварная вытворчасць. І гэта зыходзіць ужо нават з нашай ментальнасці. Мы прывыклі рабіць усё разам, сумесна. Але не толькі ў гэтым сутнасць. Буйнатаварная вытворчасць даказала сваю эфектыўнасць гадамі, і адыходзіць ад яе не мае сэнсу. Я ні ў якім разе не супраць фермерскіх гаспадарак — такая мадэль таксама мае права на існаванне. Але, як сказаў Прэзідэнт, нам патрэбна захаваць вёску, людзей, якія там жывуць, інфраструктуру сяла. А без развіцця сельгасарганізацый, без рабочых месцаў зрабіць гэта нельга.

Непрапісныя ісціны для развіцця любой галіны і для сельскай гаспадаркі, у прыватнасці, — наяў­насць дзейных кадраў і жалезная дысцыпліна. Не трэба вынаходніцтваў — проста трэба ведаць і выконваць свае абавязкі. Спецыялісты і простыя работнікі павінны захоўваць тэхналагічныя патрабаванні. Вось гэта і ёсць складаемыя рэзультату.

Зноў жа згодны з тэзісам Кіраўніка дзяржавы ў дачыненні да развіцця новых тэхналогій вырошчвання і вытворчасці прадукцыі. І важны сёння аспект на рынку не столькі ўзровень імпартазамяшчэння, колькі якасць. Пакупнік абавязкова зробіць выбар у бок лепшага тавару. Вось на павышэнне якасці і трэба накіроўваць работу.

Ірына ПЯТРОЎСКАЯ, намеснік начальніка ўпраўлення па працы, занятасці і сацыяльнай абароне райвыканкама:

— Як адзначыў Прэзідэнт, дабрабыт народа — адзін з галоўных прыярытэтаў сацыяльнай палітыкі дзяржавы. Таму важна, каб у кожнага грамадзяніна былі праца, дастойная зарплата, пенсія, нягледзячы на тое, што ў некаторых з іх — абмежаваныя магчымасці або цяжкая жыццёвая сітуацыя. Увага таксама надаецца і дэмаграфічнай палітыцы.

Што тычыцца пытання працаўладкавання, то ў нашым раёне ажыцяўляецца сістэмная работа ў гэтым накірунку: праводзяцца “кірмашы вакансій”, аказваецца садзейнічанне ў пошуку працы грама­дзянам, якія не занятыя ў эканоміцы, ажыццяўляецца перанавучанне па некаторых спецыяльнасцях і іншае.
Пашыраюцца правы і магчымасці маладых лю­дзей з інваліднасцю праз рэалізацыю права на працоўную і прадпрымальніцкую дзейнасць: у РЦСАН укаранёна форма работы па падрыхтоўцы маладых інвалідаў да рамеснай дзейнасці. Гэта дазваляе не толькі атрымліваць задавальненне ад сваёй працы, але і забяспечвае працаўладкаванне інваліда як рамесніка з рэалізацыяй сваіх вырабаў, дае ім дадатковы заробак.

Унесена прапанова аб павышэнні з 1 мая пенсій. Магчыма, што дадзенае павышэнне — не апошняе ў гэтым годзе, хоць усё залежыць ад работы эканомікі і фарміравання фонду заработнай платы. У Беларусі дзейнічае салідарная сістэма: працаздольная мо­ладзь зарабляе для сваіх пажылых бацькоў.
Мнагадзетным сем’ям аказваецца матэрыяльная падтрымка ў выглядзе сямейнага капіталу, адначасовых выплат, аднаразовай матэрыяльнай дапамогі да навучальнага года і іншая.

У цэлым можна сказаць, што сацыяльная сфера не стаіць на месцы — удасканальваецца заканадаўства, ствараюцца ўмовы для камфортнага жыцця грама­дзян, іх матэрыяльнага забеспячэння і стабільнасці ў будучыні.