Пасля наведвання групы грамадзянства і міграцыі РАУС, станоўчага вырашэння яго канкрэтных праблем грамадзянін Украіны Мікалай Санкоўскі застаўся задаволеным. Ён зрабіў адпаведны запіс у Кнізе заўваг і прапаноў аддзела ўнутраных спраў райвыканкама, у якім выказаў словы ўдзячнасці вядучаму спецыялісту па рэгістру насельніцтва Святлане Назарчук (на здымку — у цэнтры з калегамі Тамарай Рымаравай і Аленай Гурскай) за высокі прафесіяналізм і чуласць да наведвальнікаў, а таксама супрацоўнікам райаддзела, якія з разуменнем паставіліся да вырашэння яго праблем.
Ураджэнец нашай краіны з 1967 года пражываў ва Украіне, а зараз вырашыў вярнуцца на малую радзіму. Мікалай Санкоўскі для далейшага пражывання выбраў в.Збышын нашага раёна. Дзякуючы праяўленай увазе і дапамозе ў афармленні неабходных даведак з боку супрацоўнікаў РАУС у хуткім часе Мікалай Уладзіміравіч стане грамадзянінам Рэспублікі Беларусь.
Па дадзеных групы грамадзянства і міграцыі, у цяперашні час на Кіраўшчыне пражываюць 94 жыхары Украіны. Сёлета на пастаяннае месца жыхарства ў наш раён прыбылі 11 чалавек, уключаючы дзяцей. Асобныя з іх маюць намер атрымаць грамадзянства Рэспублікі Беларусь, адмовіўшыся ад украінскага.