На базе Жыліцкага сельгаскаледжа завяршыўся 30-ты, юбілейны турнір па міні-футболе памяці воіна-інтэрнацыяналіста Аляксандра Ядлоўскага. Як і ў былыя гады, паядынкі паміж камандамі-ўдзельніцамі праходзілі цікава, у вострай барацьбе. Аб тым, як праходзіў турнір, рэдактару інтэрнет-рэсурса «Кіраўца» расказаў  кіраўнік фізічнай культуры Жыліцкага сельгаскаледжа, галоўны суддзя турніру Уладзімір Пракопчык.

На працягу месяца доўжыўся міні-футбольны марафон, у якім прынялі ўдзел 12 каманд. Палова з іх прадстаўляла сельгаскаледж: па адной ад кожнага з 4 курсаў, асобная зборная ўсіх курсаў і каманда выкладчыкаў. Таксама ўдзел у турніры прынялі каманды райаддзела па надзвычайных сітуацыях, ААТ “Рассвет імя К.П.Арлоўскага”, КСУП “Чырвоны баец”, ААТ “Дабаснянскае”. Паколькі турнір насіў статус адкрытага, то заяўкі падалі яшчэ і дзве каманды з суседняга Бабруйска — “Саюз-Энерга” і СПК “Гігант” Бабруйскага раёна.

Каманды сустракаліся паміж сабой па кругавой сістэме. Усяго было згуляна больш за 70 матчаў. Па іх выніках чацвёрка мацнейшых склала паўфінальныя пары. Адметна, што адна з іх атрымалася “кіраўская”, другая — “бабруйская”. У першым паўфінале сустрэліся зборная навучэнцаў каледжа і каманда РАНС. Выратавальнікі аказаліся мацнейшымі за апанентаў. У другім спарынгу “Саюз-Энерга” ўпэўнена ўзяла верх над “Гігантам”. Апошняя каманда сустэлася з каледжаўцамі ў матчы за 3-е месца. На жаль, гаспадарам пляцоўкі не ўдалося “зачапіцца” за п’едэстал гонару: перамога — за “Гігантам”.

Фінальны паядынак паміж камандай РАНС і “Саюз-Энерга” выдаўся цікавым, з вострай барацьбой. І ўсё ж кіраўчанам аказалася цяжкавата змагацца з камандай, якая выступае ў рэгулярным чэмпіянаце краіны. Бабруйчане ўзялі верх і сталі пераможцамі турніру. Адзначым, што і летась “Саюз-Энерга” прымала ўдзел у турніры і была мацнейшай за ўсіх сапернікаў.

На цырымоніі ўзнагароджвання дырэктар сельгаскаледжа Уладзімір Белы ўручыў камандзе-пераможцы пераходны кубак. Усе прызёры былі ўзнагароджаны каштоўнымі падарункамі. Таксама былі адзначаны лепшыя ігракі каманд.