28 жніўня адзначыла сваё 95-годдзе ветэран Вялікай Айчыннай вайны і  працы кіраўчанка Марыя Іванаўна Гарохава. Паважаная жанчына прымала віншаванні з нагоды знамянальнай для яе даты. Падарункі ад раённага выканаўчага камітэта, раённага савета ветэранаў вайны і працы, раённых структур РГА “Белая Русь”, ГА “Беларускі фонд міру” з самымі цёплымі пажаданнямі юбіляршы ўручылі начальнік аддзела ідэалагічнай работы, культуры і па справах моладзі Ларыса Гаўрылава, старшыня раённага Савета ветэранаў Эма Карпук, старшыня раённай арганізацыі РГА “Белая Русь” Васіль Маркевіч”.

У жыцці Марыі Іванаўны Вялікая Айчынная вайна займае адметнае месца. У тыя страшныя гады яна мужна змагалася з нямецка-фашысцкімі захопнікамі ў саставе партызанскага атрада.

У яе роднай вёсцы Колбава падчас акупацыі хлопцы і дзяўчаты арганізавалі камсамольскую ячэйку і дапамагалі партызанам: збіралі інфармацыю аб колькасці гітлераўцаў, наяўнасці зброі, перадавалі ў лес боепрыпасы, медыкаменты, распаўсюджвалі сярод насельніцтва лістоўкі, агітавалі людзей уступаць у партызанскі атрад, няшчадна біць ворага. Сярод маладых людзей была і Марыя. Ёй удалося пераканаць шасцярых сваіх аднавяскоўцаў, якія служылі ў паліцыі, перайсці на бок партызан. Потым і сама дзяўчына ўступіла ў атрад і змагалася з ворагам са зброяй у руках. Разам з іншымі байцамі яна прымала ўдзел у разгроме паліцэйскіх гарнізонаў, выратаванні мірных людзей ад угону ў канцлагеры.

Сапраўдная патрыётка сваёй Радзімы, мужная унесла свой уклад у тое, каб наступныя пакаленні яе землякоў і ўсіх беларусаў жылі пад мірным небам.

Пасля вайны Марыя Іванаўна прымала ўдзел у аднаўленні разбуранай народнай гаспадаркі роднай Кіраўшчыны, доўгі час працавала ў органах пракуратуры. Сумленна ставілася да выканання службовых абавязкаў, з павагай — да людзей, з любоўю і пяшчотай — да сям’і.

Няхай жа для гэтага паважанага чалавека гады не стануць перашкодай для здароўя, а восень жыцця будзе напоўнена цеплынёй і пяшчотай!