На мінулым тыдні 15 чэрвеня выязны прыём грамадзян, індывідуальных прадпрымальнікаў, прадстаўнікоў юрыдычных асоб правёў міністр па падатках і зборах Рэспублікі Беларусь Сяргей Налівайка.
У правядзенні выязнога прыёму прымалі ўдзел старшыня райвыканкама Аляксандр Бутараў, начальнікі інспекцый Міністэрства па падатках і зборах: па Магілёўскай вобласці — Іван Кажамяка, па Кіраўскім раёне — Віктар Каранкевіч.
На прыёме ў міністра пабывалі галоўныя бухгалтары дзвюх арганізацый: СВК “Калгас “Ніва” Д.А.Анісковіч і філіяла “Кіраўскі райпаліўзбыт” МАУВП “Аблпаліва” Т.М.Хлапкова — іх цікавілі пытанні, звязаныя з укараненнем з 1 ліпеня бягучага года электронных рахункаў-фактур.
Індывідуальны прадпрымальнік М.Я.Логвін звярнуўся ў ходзе прыёму з пытаннем наконт магчымасці абмежавання гандлёвай нацэнкі на тавары першым пастаўшчыком для індывідуальных прадпрымальнікаў у параўнанні з юрыдычнымі асобамі, напрыклад, ААТ “Евроторг” (магазін “Евроопт”).
Шэраг пытанняў, звязаных з падатковым абкладаннем, цікавіў дырэктара ПУП “Андриколавто” А.І.Каляснёва, у прыватнасці, прымяненне ўмененага падатку для прадпрыемстваў з колькасцю работнікаў да 15 чалавек.
На ўсе пытанні, якія, як бачна, тычыліся менавіта сферы дзейнасці Міністэрства па падатках і зборах, заяўнікі атрымалі дакладныя, кампетэнтныя тлумачэнні.
Ведучы размову з прадстаўнікамі малога бізнэсу, міністр па падатках і зборах Рэспублікі Беларусь С.Э.Налівайка асабліва падкрэсліў, што ў нашай краіне створаны лаяльныя ўмовы для вядзення бізнэсу, галоўнае, навучыцца эфектыўна працаваць.
Фота Максіма МІКЕШЫНА.