Традыцыйны агляд-конкурс “Юны інспектар дарожнага руху”, які штогод праводзіцца на базе Цэнтра дадатковай адукацыі дзяцей і моладзі, сёлета сабраў 9 каманд з устаноў адукацыі. Аб гэтым расказала педагог-арганізатар ЦДАДіМ Святлана Каспяровіч. 
Як заўсёды, адным з арганізатараў спаборніцтваў выступіла аддзяленне дзярж­аўтаінспекцыі РАУС. Яго супрацоўнікі разам з педагогамі прынялі ўдзел у судзействе конкурсаў. Мэты агляду-конкурсу напрамую пераклікаюцца з задачамі дарожнай інспекцыі: прафілактыка і папярэджванне дзіцячага дарожна-транспартнага траўматызму, выхаванне законапаслухмяных удзельнікаў дарожнага руху, прыцягненне ўвагі дзяржаўных і грамадскіх арганізацый да праблемы дзіцячага дарожна-транспартнага траўматызму, прапаганда здаровага ладу жыцця.
Праграма спаборніц­тваў, як заўсёды, была вельмі насычанай. Каб быць у лідарах, камандам трэба было як мага лепей праявіць сябе ў 7 конкурсах. У залежнасці ад іх характару лепшыя выяўляліся як у асабістым, так і камандным заліку.
У конкурсе “Уважлівы ўдзельнік дарожнага руху” найлепшыя здольнасці праявілі Цімур Новікаў з Мышкавіцкай СШ і Уладзімір Садоўскі з Чыгірынскай СШ.
Далёка не ўсім удалося чыста праехаць на этапе “Фігурнае ваджэнне веласіпеда”, бо, як заўсёды, удзельнікаў чакалі на дыстанцыі хітрыя пера­шкоды. Найбольш хутка і якасна з імі справіліся: сярод хлопчыкаў — Арсеній Юрчанка з Мышкавіцкай СШ, у дзяўчынак — Настасся Котава з Паўлавіцкай СШ імя Р.А.Худалеева.
Навыкі медыцыны ўдзельнікі дэманстравалі ў конкурсе “Аказанне першай дапамогі пацярпеўшаму”. Найлепш праявілі сябе прадстаўнік Паўлавіцкай школы Максім Іваноў і Настасся Еўдакімава з Баравіцкай СШ.
Лепшую тэарэтычную падрыхтоўку на веданне правілаў дарожнага руху прадэманстравалі Арсен Кед з Баравіцкай СШ і вучаніца Дабаснянскага НПК ДС-СШ Вікторыя Мітраховіч.
Адным з самых відовішчных, як заўсёды, быў конкурс “Агітацыйна-мастацкае прадстаўленне”, дзе рабяты ў сваіх тэматычных выступленнях праявілі артыстычныя здольнасці. Мацнейшай тут стала агітбрыгада каманды “Дарожны дазор” з СШ №2 імя К.П.Арлоўскага, другое месца заняла каманда “Дарожны патруль” з Мышкавіцкай СШ і трэцяе — паўлавіцкая каманда “ДПС”.
У такім жа парадку гэтыя тры каманды размясціліся ў “табелі аб рангах” і ў конкурсе “Газета”.
У конкурсе-прэзентацыі “Мой атрад” не было роўных камандзе з Дабаснянскага НПК ДС-СШ, другое і трэцяе месцы адпаведна занялі зборныя Паўлавіцкай і Баравіцкай школ.
Па выніках усіх конкурсаў агульнакамандную перамогу святкавала каманда “ДПС” Паўлавіцкай СШ імя Р.А.Худалее­ва, якая змагла адцясніць з першага радка лідара апошніх гадоў “Дарожны дазор” з СШ №2 імя К.П.Арлоўскага, зараз кіраўчане сталі другімі. Удалым можна назваць сёлетняе выступленне ЮІДаўцаў з Баравіцкай СШ, якія замкнулі тройку прызёраў.
Камандзе-пераможцы даручана права прадстаўляць наш раён на занальных спаборніцтвах у Бабруйску.