Дзень абаронца Айчыны і Узброеных Сіл Рэспублікі Беларусь аматары лыжнага спорту Магілёўскай вобласці адзначылі гоначнымі стартамі. Ў Магілёве на спартыўных пляцоўках Пячэрскага лесапарку адбылося традыцыйнае абласное зімовае свята “Беларуская лыжня-2013”. У ім прынялі ўдзел звыш 400 спартсменаў і лыжнікаў-аматараў з усіх раёнаў Магілёўскай вобласці, у тым ліку і каманда нашага раёна.
У дзел у лыжных гонках, прычым не ў якасці гледачоў альбо балельшчыкаў, а лыжнікаў прымалі старшыня Магілёўскага аблвыканкама Пётр Руднік, а таксама яго намеснік Валерый Малашка. У прывітальным слове Пётр Міхайлавіч нагадаў, што здаровы лад жыцця — ў прыярытэце сацыяльнай палітыкі дзяржавы.
Гонар Кіраўшчыны абараняла каманда з 11 чалавек начале са старшынёй райвыканкама Уладзімірам Піскіжавым. За лідарства на лыжнай дыстанцыі кіраўнік нашага раёна спрачаўся ў асабістым забегу са старшынямі гар- і райвыканкамаў, начальнікамі структурных падраздзяленняў аблвыканкама. У выніку ў забегу сярод удзельнікаў да 45 год Уладзімір Піскіжаў заняў ганаровае другое месца.
У лыжных спаборніцтвах прымалі ўдзел не толькі дарослыя, але і дзеці, вучні школ, навучэнцы ВНУ, ССНУ і каледжаў. Пераможцы і прызёры былі ўзнагароджаны грашовымі прызамі і дыпломамі.
Каб падмацаваць сілы пасля спартыўных стартаў, паходная салдацкая кухня прапаноўвала фірменную страву — ячную кашу. У шматлікіх гандлёвых кропках можна было набыць чай, каву, свежую выпечку.
Па водгуках кіраўчан — удзельнікаў “Беларускай лыжні-2013”, гэтае зімовае свята дало магчымасць не толькі цікава і карысна правесці святочны выхадны дзень, але і назапасіць вялізны запал бадзёрасці, энергіі і цудоўнага настрою.