Пад такой назвай у мінулую суботу на стадыёне райцэнтра адбылося культурна-спартыўнае свята. Тут сабраліся каманды прадпрыемстваў, арганізацый, сельсаветаў, устаноў адукацыі. Акрамя іх на стадыён прыйшло шмат кіраўчан рознага ўзросту, якія прымалі самы актыўны ўдзел у спаборніцтвах: міні-біятлоне, дартсе, стральбе з пнеўматычнай вінтоўкі, шашках, сямейных спаборніцтвах на санях, “Снежны снайпер” і інш.
Са словамі прывітання да тых, хто свой выхадны дзень скарыстаў з карысцю для здароўя, прыйшоў на стадыён, каб паспаборнічаць, пахварэць за іншых, звярнуўся начальнік аддзела ідэалагічнай работы райвыканкама А.Л. Карпук. Ён адзначыў, што спартыўныя спаборніцтвы кожны раз пацвярджаюць: няма мяжы магчымасцям у прыхільнікаў здаровага ладу жыцця.
Весела, масава, забаўляльна праходзіла свята. Пачаткам спаборніцтваў паслужыла песня “Героям спорта”, якую праспявалі прысутныя разам з вядучым А.Шапялевічам. Затым каманды разыйшліся на вызначаныя месцы для ўдзелу ў спаборніцтвах і конкурсах.
Вельмі парадавалі гледачоў самыя маленькія, для якіх быў наладжаны конкурс “Качаняты пройдуць для вас!” Спачатку старт быў дадзены хлопчыкам, а затым — дзяўчынкам. Стараліся ўсе, але не ўсе былі першымі. Самыя спрытныя на фінішы атрымалі прызы.
Па-сапраўднаму захапляльным было сямейнае катанне на санях: кожны тата за вяроўку цягнуў сані з жонкай і дзіцем цэлых 100 метраў! Як толькі мужчыны пачыналі разбег, ногі коўзаліся ў розныя бакі, яны падалі, падымаліся і ўпарта беглі наперад. Весяліліся ўсе: і самі ўдзельнікі, і прысутныя. А перамогу святкавалі сем’і Міхайлюк (Дабаснянскі с/С), Улашчанка (г.Кіраўск), Доўгіх (Паўлавіцкі с/С). Яны былі ўзнагароджаны каштоўнымі падарункамі, а заахвочвальныя прызы атрымалі сем’і Арцюховых (г.Кіраўск) і Зоркіных (Баравіцкі с/С).
Аматараў лыж захапілі спаборніцтвы па міні-біятлоне. Сярод мужчын перамаглі прадстаўнікі Мышкавіцкага сельсавета: В.Бяляўскі, Я.Пішчалін і А.Марцючэнка. А прадстаўніцы Стайкаўскага — Г.Пуцята і Г.Шаўцова сталі лепшымі сярод жанчын: ім не было канкурэнцыі, бо толькі яны ўдзвюх выйшлі на старт. В.Садоўскі са Стаек выступіў без штрафных кругоў. Па ўласным жаданні прыняў удзел у спаборніцтве кіраўчанін М.І.Бондараў, і, нягледзячы на пенсіённы ўзрост, паказаў добры вынік.
(Працяг у №7 райннай газеты ад 25 студзеня).