І зноў Чыгірынскае вадасховішча стала эпіцэнтрам рыбалоўных баталій: у мінулую суботу нягледзячы на вельмі марознае надвор’е, ля дамбы ГЭС сабралося шмат сапраўдных прыхільнікаў зімовай рыбалкі і здаровага ладу жыцця. Прычым, як аматараў, так і спартсменаў-прафесіяналаў. У паралельным фармаце праходзілі чарговае зімова-каманднае першынство раёна і першы этап чэмпіянату Рэспублікі Беларусь па спартыўнай надлёднай лоўлі рыбы на мармышку.
Рыбакам сёлетняй зімой доўга прыйшлося чакаць усталявання трывалага лёдавага покрыву на любімых вадаёмах. З-за неспрыяльнага надвор’я пераносіліся і рэспубліканскія спаборніцтвы па надлёднай лоўлі рыбы. І вось, нарэшце, усе дачакаліся і паспяшаліся на спаборніцтвы насуперак 25-градуснаму з раніцы марозу!
На здымку: пераможца першынства раёна па спартыўнай надлёднай лоўлі рыбы на мармышку — каманда ДЮСШ разам са старшынёй райвыканкама Уладзімірам Піскіжавым. У саставе каманды: Валянцін Шакараў, Ігар Масюковіч (пераможца ў асабістым заліку), Дзмітрый Вароніч.
Першымі адкрылі сваё першынство кіраўчане. Пад гукі Дзяржаўнага гімна Рэспублікі Беларусь быў узняты Дзяржаўны флаг краіны. На ўрачыстым пастраенні ўдзельнікаў каманд (а іх заявілася на ўдзел у спаборніцтвах 9), балельшчыкаў шчыра вітаў старшыня райвыканкама Уладзімір Піскіжаў. Дарэчы, як і заўжды, ён сам быў удзельнікам першынства раёна па рыбнай лоўлі, і разам з ім у камандзе былі сын Ігар, навучэнец гімназіі, і пракурор раёна Вячаслаў Паршук, таксама актыўныя аматары і зімовай, і летняй рыбалкі. Астатнія каманды прадстаўлялі ДЮСШ, ААТ “Кіраўск-Лён”, СВК “Рассвет” імя К.П.Арлоўскага, раённы аддзел па надзвычайных сітуацыях, РАПТЗ, райспажыўтаварыства, Скрыпліцкі сельсавет, прыватнае прадпрыемства “Булат-Сталь”, якое разам з раённымі арганізацыямі грамадскіх аб’яднанняў “Белая Русь” і “Беларускі фонд міру” выступіла спонсарам спаборніцтваў. Камандныя прызы, дыпломы падрыхтавалі аддзел фізічнай культуры, спорту і турызму райвыканкама і фізкультурна-спартыўны клуб, якія былі арганізатарамі першынства.
Уладзімір Піскіжаў, звяртаючыся да прысутных, падкрэсліў: гэта цудоўна, што кіраўскія аматары рыбнай лоўлі спаўна выкарыстоўваюць магчымасці такога вадаёма, як Чыгірынскае вадасховішча, і ў летні, і ў зімовы перыяд выязджаюць на рыбалку, удасканальваюць свае навыкі. Старшыня райвыканкама выказаў меркаванне, што пагодныя ўмовы нададуць асаблівы інтарэс спаборніцтвам: будзе, безумоўна, нялёгка пры такім марозе, але майстэрства, цярплівасць, а, самае галоўнае, рыбацкая ўдача дазволяць кожнаму быць з уловам!
Са святам зімовай спартыўнай рыбалкі кіраўчан павіншаваў намеснік старшыні Беларускага грамадскага аб’яднання “Федэрацыя рыбалоўнага спорту” Канстанцін Ціханаў і выказаў удзячнасць кіраўніцтву раёна на чале з Уладзімірам Піскіжавым за прыхільнасць здароваму ладу жыцця, падтрымку рыбалоўных спаборніцтваў і зімой, і летам. І пажадаў удзельнікам першынства, як кажуць рыбаловы, ні хваста, ні лускі!
Прадстаўнікі каманд накіраваліся ў вызначаныя непадалёку ад дамбы Чыгірынскай ГЭС сектары лоўлі рыбы. Перад гэтым усе былі папярэджаны аб неабходнасці захавання мер бяспекі на лёдзе. Падчас спаборніцтваў дзяжурылі матрос-выратавальнік, машына “хуткай дапамогі”, а гарачымі стравамі частавалі работнікі гандлю. Прыўзнятага настрою дадавалі культработнікі і мясцовыя артысты мастацкай самадзейнасці.
Хутка дзякуючы намаганням рыбаловаў на лёдзе сталі з’яўляцца лункі, і ўдзельнікі першынства прыступілі да лоўлі, засяроджана паглядаючы на вуды. Аб кожнай новай здабычы яны паведамлялі суддзям і выкладвалі рыбу на лёд. Адным стала адразу шанцаваць, другім прыйшлося пачакаць удачы. Сярод удзельнікаў былі і вопытныя, заўзятыя рыбаловы, з уласнымі “сакрэтамі” свайго хобі, і навічкі, якім цікава было спасцігнуць гэтае майстэрства, як, напрыклад, Яўгену Пішчаліну з каманды “Рассвета”.
Усе ўвайшлі ў азарт ад добрага клёву і нахвальвалі “рыбалоўнае” сонечнае, бязветранае надвор’е.
І вось праз дзве з лішнім гадзіны надышоў момант узважвання злоўленага. Кожны член каманды прыносіў на вагі свой улоў, потым узважваўся агульнакамандны.
Першае месца з уловам у 735 грамаў заняла каманда ДЮСШ у саставе Валянціна Шакарава, Ігара Масюковіча, Дзмітрыя Вароніча. Другое месца з рэзультатам 644г — у каманды ААТ “Кіраўск-Лён” (Фёдар Багамолаў, Віталь Юдко, Сяргей Сітцаў), трэцяе месца — у каманды райвыканкама ў саставе Уладзіміра і Ігара Піскіжавых, Вячаслава Паршука (634 г).
У асабістым першынстве перамогу святкаваў Ігар Масюковіч (ДЮСШ), улоў якога склаў 422 г, другое і трэцяе месцы занялі адпаведна Сяргей Трухановіч (“СВК “Рассвет” імя К.П.Арлоўскага) і Фёдар Багамолаў (ААТ “Кіраўск-Лён”). Самая вялікая рыбіна — у 148 г — трапіла на мармышку прадстаўніка каманды РАНС Аляксандра Жураўскага, самыя маленькія — па 4 грамы — аказаліся адразу ў чацвярых чалавек.
Камандам былі ўручаны Дыпломы і прызы, а пераможцам у асабістым заліку — грашовыя прэміі, сфарміраваныя за кошт уступных арганізацыйных узносаў.
Актыўнай удзельніцай і зімовых, і летніх спаборніцтваў па рыбнай лоўлі з’яўляюцца каманда прыватнага прадпрыемства “Булат-Сталь” і яе дырэктар Аляксандр Падашэўскі, а таксама, як мы ўжо адзначылі, гэтае прадпрыемства выступае спонсарам.
Аляксандр Падашэўскі ўручыў прыз ад “Булат-Сталі” самаму малодшаму ўдзельніку першынства Ігару Піскіжаву, які на ўсіх праводзімых у раёне спаборніцтвах па рыбнай лоўлі нароўне са сталымі мужчынамі вытрымлівае непрадбачныя сюрпрызы надвор’я і паказвае добрыя рэзультаты!
Старшыня райвыканкама выказаў задавальненне тым, што спаборніцтвы прайшлі дружна, арганізавана, сумленна, па-дзякаваў усім за ўдзел і пажадаў тым, каму не вельмі пашанцавала, з новым запалаам рыхтавацца да першынства наступнага года.
Калі кіраўчане ўжо атрымлівалі асалоду ад добрага клёву, рыхтаваліся адкрыць зімовы сезон-2012 удзельнікі першага этапу чэмпіянату Рэспублікі Беларусь па спартыўнай лоўлі рыбы на мармышку. Дарэчы, да 11 беларускіх каманд далучылася каманда Ленінградскай вобласці. І спрачацца з мужнымі і адважнымі мужчынамі была гатова адзіная дзяўчына Настасся Пракапенка з каманды юніёраў: увогуле, як мы даведаліся, яна — першая ў гісторыі беларускага рыбалоўнага спорту прадстаўніца цудоўнага полу.
Старшыня Беларускага грамадскага аб’яднання “Федэрацыя рыбалоўнага спорту” Яраслаў Ціхановіч выказаў надзею, што барацьба падчас спаборніцтваў будзе цікавай, захапляльнай і, разам з тым, карэктнай, паколькі разам з вопытнымі спартсменамі ў бой уступае каманда-дэбютант.
На гэтым этапе, падкрэсліў Яраслаў, назіраецца максімальная колькасць удзельнікаў за апошнія тры гады і пажадаў, каб такая тэндэнцыя захоўвалася ў далейшым. Ён таксама выказаў удзячнасць Кіраўскаму райвыканкаму за пастаянную дапамогу ў арганізацыі і правядзенні спаборніцтваў.
Гасцей шчыра вітала Вольга Гаршкова і пажадала добрага клёву, а ён на гэты момант на вадаёме меў месца, што было даказана кіраўскімі аматарамі.
У хуткім часе непадалёк ад нашых рыбаловаў занялі свае сектары спартсмены. Іх спаборніцтва доўжылася два дні. А перамогу святкавала каманда “БРИК” (вялікага рыбалоўнага інтэрнэт-клуба) з двухдзённым уловам у 5772 г. Другое і трэцяе месцы — на рахунку мінскіх каманд “Байкал” і “RS ice fiching”.
У асабістым першынстве з рэзультатам 2518 г выйграў Вадзім Якубовіч з каманды “RS ice fiching”. На другім і трэцім месцах адпаведна — Максім Кусмарцаў з каманды Ленінградскай вобласці і Сяргей Драздоўскі з “БРИК”.
Самую буйную рыбу злавіў таксама Вадзім Якубовіч: гэта быў лешч вагой 433 г.
Ля дамбы самадзейныя артысты запрашалі ўсіх на карагод, работнікі РДК праводзілі цікавыя гульні і конкурсы, усе жадаючыя мелі магчымасць пакатацца на санях, а хто замёрз — пачаставацца гарачым булёнам і чаем ля гандлёвай палаткі — адным словам, атрымалася свята рыбалоўнага спорту і сапраўднай зімы з незабыўнымі ўражаннямі і цудоўным настроем усіх, хто ў ім удзельнічаў!
Наталля ХАДАКОВА.
Фота
Максіма МІКЕШЫНА
і Віктара ГАЛОМЗІКА.