Незвычайным, маляўнічым, захапляльным і відовішчным стала мерапрыемства, якое нала­дзілі супрацоўнікі раённага аддзела па надзвычайных сітуацыях 25 ліпеня ў дзень святкавання 165-й гадавіны ўтварэння пажарнай службы Беларусі. Варта адзначыць, што ладзіцца яно ўпершыню, таму і выклікала ў яго ўдзельнікаў і гледачоў шмат яркіх эмоцый і незабыўных момантаў…

Пачалося ўрачыстае шэсце супрацоўнікаў РАНС і парад пажарна-выратавальнай тэхнікі ад вуліцы Гагарына. Апладысментамі сустракалі кіраўчане і госці горада аўтамабілі з мігалкамі і гукавым суправаджэннем, якія рухаліся па вул.Кірава да плошчы, дзе і разгарнулася галоўнае святочнае дзейства.

Павіншаваць прадстаўнікоў адной з самых неабходных і мужных прафесій прыйшлі старшыня раённага Савета дэпутатаў Галіна Слабоднікава, намеснікі старшыні райвыканкама Вячаслаў Нявінскі і Таццяна Русецкая, пракурор раёна Вячаслаў Чучулін.
Віншаванні ў адрас віноўнікаў урачыстасці ад імя раённага выканаўчага камітэта і раённага Савета дэпутатаў выказала Галіна Слабоднікава. Звяртаючыся да прысутных, яна адзначыла, што за гады існавання пажарнай службы яе роля застаецца нязменнай і зараз: першай прыходзіць на дапамогу, выратоўваць лю­дзей, трапіўшых у бяду, часта рызыкуючы ўласным жыццём. За свой службова-баявы шлях, спалучаны з трывогамі і небяспекамі, беларускія пажарныя неаднаразова дэманстравалі самаадданасць, стойкасць і адвагу.

Зладжана, з высокім прафесійным майстэрствам спраўляецца з пастаўленымі задачамі калектыў раённага аддзела па надзвычайных сітуацыях. За апошнія 5 гадоў у раёне назіраецца ўстойлівая тэндэнцыя зніжэння колькасці пажараў і гібелі людзей ад іх.
Асаблівыя словы ўдзячнасці за рэзультатыўную работу прагучалі ў адрас начальніка каравула Міхаіла Патапейкі, старшага інспектара Максіма Антоненкі, старшага пажарнага Паўла Кандрацьева, начальніка ПАВП №13 Валерыя Шаболды, камандзіра аддзялення Аляксандра Булачкіна, вадзіцеля Валерыя Наўрозава. Неацэнны вопыт ветэранаў пажарнай службы — Міхаіла Шынкевіча, Дзмітрыя Карніцкага, Міхаіла Каранкевіча і многіх іншых.
Галіна Слабоднікава выказала ўпэўненасць, што прадстаўнікі РАНС і надалей будуць узорам адданага служэння свайму народу ў імя працвітання Беларусі.
Са словамі падзякі за самаадданую службу і віншаваннямі звярнуўся да супрацоўнікаў РАНС яго начальнік Сяргей Собаль. «У дзень і ўноч, у будні і святы вы заўсёды на варце самай вялікай каштоўнасці ў свеце — жыцця чалавека, — адзначыў ён. — Сучасныя выратавальнікі-пажарныя здольныя аказаць дапамогу не толькі на сушы, але і на вадзе, у паветры. Кожны з вас, не задумваючыся, гатовы дзеля выратавання чужога жыцця рызыкаваць сваім. На гэта здольныя толькі мужныя, самаахвярныя прафесіяналы, якія сёння нясуць службу ў органах МНС».
Затым адбылася ўрачыстая цырымонія ўзнагароджвання лепшых прадстаўнікоў РАНС. Так, Падзячнымі пісьмамі райвыканкама былі ўзнагароджаны камандзір аддзялення ПАВЧ №1 Дзмітрый Гукаў і інспектар інспекцыі нагляду і прафілактыкі Іван Мельнік.
Юбілейнымі медалямі ў гонар 165-й гадавіны пажарнай службы былі адзначаны: першы намеснік начальніка РАНС Вячаслаў Сідараў, намеснік начальніка Андрэй Архіпаў, інспектар па кадрах Арцём Марозаў, начальнік каравула ПАВЧ Сяргей Архіпенка, старшына ПАВЧ Уладзімір Якаўлеў, а таксама ветэраны пажарнай службы Таццяна Шынкевіч і Мікалай Мухін. Каштоўны падарунак атрымаў старшыня раённага аддзялення БГА «выратавальнік» Анатоль Баркоў.
Таксама падчас святочнага мерапрыемства былі адзначаны супрацоўнікі РАУС і раённага аддзялення дэпартамента аховы за выратаванне чалавечых жыццяў. Каштоўнымі падарункамі былі ўзнагаро­джаны: участковы інспектар міліцыі Сяргей Катаражук, міліцыянер-вадзіцель і мілі­цыянер групы затрымання Яўген Лазаковіч і Віталь Фралоў. Стаўшы сведкамі пажараў, яны праявілі мужнасць і выратавалі людзей.

Кульмінацыяй свята стала дэманстрацыя супрацоўнікамі РАНС сваіх навыкаў і ўменняў падчас ліквідацыі пажара, на шчасце, у гэты раз ён быў імправізаваны. Гледачы, а на свята завітала вялікая колькасць жыхароў горада, прадстаўнікоў калектываў і арганізацый, а таксама моладзі і выхаванцаў дзіцячых садкоў, з захапленнем назіралі за зладжанымі дзеяннямі пажарных і ўзнагароджвалі байцоў бурнымі апладысментамі. Заварожваючым і відовішчным было воднае шоу, якое супрацоўнікі РАНС выканалі пры дапамозе пажарнай тэхнікі.
Шмат было жадаючых, якія, апрануўшы спецадзенне, мелі магчымасць паспрабаваць сябе ў ролі пажарных і зайсці ў дым-палатку. Дзятва з задавальненнем паўдзельнічала ў гульнях, конкурсах і віктарынах па правілах бяспекі жыцця­дзейнасці.
Дапамагалі прадстаўнікам РАНС наладзіць святочнае мерапрыемства, а таксама парадавалі гледачоў музычнымі нумарамі работнікі культуры.
Людміла СЯМЁНАВА.
Фота Максіма МІКЕШЫНА.