Рэальная вясна пакуль не вельмі спяшаецца расквеціць прыроду новымі фарбамі – холад яшчэ не здае сваіх пазіцый. Але ёсць на Кіраўшчыне месца, дзе ён не ўласны: лета тут пануе практычна круглы год, а ў гэтыя сакавіцкія дні тут усё патанае ў зеляніне. Многія, пэўна, здагадаліся, што гаворка вядзецца пра цяплічны камбінат ААТ “Рассвет імя К.П.Арлоўскага”.

Агародніна, вырашчаная ў цяплічных гектарах гаспадаркі, пачала ўжо радаваць пладамі і пакупнікоў, і, безумоўна, саміх вытворцаў. Працэс яны адшліфавалі такім чынам, што першыя агуркі традыцыйна паспяваюць да 23 лютага. Не стаў выключэннем і сёлетні год.

Як расказала галоўны тэхнолаг камбіната Марыя Бяляўская, сёлета плошчы, адведзеныя пад агуркі, павялічылі з 2 да 4 га. З іх палову займаюць сярэдняплодныя гібрыды “яні”, якія даўно карыстаюцца попытам, і столькі ж – гібрыды гатунку “бёрн”. Гэтыя агуркі – кароткаплодныя, вельмі духмяныя і смачныя, у продажы не затрымліваюцца. Дарэчы, з пачатку выбарак пладоў сабрана і рэалізавана больш 15 т вітаміннай прадукцыі.

Кіраўчане ведаюць, што вырошчваецца агародніна ў цяплічным камбінаце не ў зямлі, а на мінеральнай ваце з кропельнай падачай усіх неабходных спажыўных рэчываў, пры пэўнай тэмпературы, патрэбным яркім асвятленні. Са шкоднікамі раслін работнікі змагаюцца біяметадамі, а апыляюць суквецці – шмялі.

Першыя агуркі паспелі за 55 дзён з моманту пасеву – у апошні дзень мінулага года. Зялёныя плады мяркуецца збіраць да канца чэрвеня, а затым распачаць новы абарот.

А вось таматы пасеялі раней – 17 снежня. З улікам таго, што іх паспяванне будзе адбывацца дзён праз 100, першы ўраджай тут плануюць сабраць у красавіку. Займаюць пасевы таматаў 6 га: на 4,5 га – буйнаплоднага гатунку “альтадэна” і на 1,5 га – слівападобны гібрыд “рамінда”. Пладамі гаспадарка забяспечыць спажыўцоў практычна да канца лістапада, а гэта значыць, разлічваюць рассветаўцы на стабільны даход ад прадукцыі камбіната.

Камапнію агуркам і таматам складзе яшчэ і расада капусты, а таксама кавуноў, якія ўжо таксама сталі ў “Рассвеце” такой жа звыклай культурай.

Зараз у штаце цяпліцы – дружная каманда колькасцю ў 162 чалавекі. Гэта не толькі непасрэдна агароднінаваоды, якія даглядаюць за раслінамі, збіраюць плады. У калектыве працуюць падсобныя рабочыя, кладаўшчыкі, электрыкі, вадзіцелі, спецыялісты. У ліку лепшых – Наталля Андрэева, Марына Гарачкова, Таццяна Максіменка, Ірына Бяляўская, Святлана Бяляўская і многія іншыя. Усе накіроўваюць свае намаганні на канчатковы рэзультат, забяспечваючы пастаўкі ў гандлёвыя кропкі “Рассвета” свежай агародніны, а гаспадарку – папаўненнем грамадскай касы.

Аляксандр ХАХЛОЎ.

Фота Максіма МІКЕШЫНА.