У няпростых умовах аграрыям сёлета даводзіцца ўбіраць ураджай збажыны: літаральна не бывае дня, каб нябесная канцылярыя не ўносіла свае карэктывы – дажджы стрымліваюць уборачную кампанію. Але сяльчане не даюць сабе паслабленняў. Яны імкнуцца сапернічаць з надвор’ем, каб з мінімальнымі стратамі сабраць вырашчаны ўраджай.

У напружаным рытме працуюць хлебаробы ААТ “Кіраўскае райаграпрамтэхзабеспячэнне”. Ім трэба ўбраць збожжавыя і зернебавовыя з 2290 га без уліку зерня кукурузы. Аб буднях мясцовых працаўнікоў палёў нам расказаў галоўны аграном гаспадаркі Уладзімір Дарафей.

Перш-наперш убралі азімы ячмень, які істотна падсушыла ў маі-чэрвені. Гэтую культуру пасеялі ўпершыню, і нават пры не зусім спрыяльным надвор’і ўдалося сабраць з кожнага з 200 га па 30 цэнтнераў зерня.

Потым пераключыліся на азімы рапс, які напалову ўжо ўбраны – агульны клін складае 580 га. Па 19 цэнтнераў на круг дае культура. Пакуль абмалочваюцца “горшыя” ўчасткі, таму ёсць спадзяванні на лепшы ўраджай. Таксама прыступілі ў арганізацыі да абмалоту азімай пшаніцы. Яна выдалася зусім неблагой – па 43 ц/га – прыкладна на ўзроўні мінулага года.
На палях шчыруць экіпажы 6-ці камбайнаў. Лідзіруюць па намалоце сямейны дуэт бацькі і сына Уладзіміра і Дзмітрыя Комараў, а таксама Андрэй Слуцкі, які працуе аднаасобна. На адвозцы збожжа ад камбайнаў тон задае Валерый Араеў.
Пры дажджлівым надвор’і павялічваецца нагрузка на работнікаў сушыльных гаспадарак. Ва Уласавічах і Кіраўску яны працуюць кругласутачна. На Уласавіцкай – вя­дзецца ачыстка зерня, сартаванне насення, давядзенне яго да патрэбнай кандыцыі. На Кіраўскай – праводзяцца асноўныя работы па сушцы зерня. Старанна працу­юць змены. У аб’ектыў рэдакцыйнай фотакамеры трапілі падсобны рабочы Антон Дзікун, слесар па абслугоўванні КЗСК-30Г Сяргей Каранкевіч і аператар КЗСК Аляксандр Беніцэвіч. Сярод лепшых работнікаў таксама аператар Уладзімір Нарэзенка, слесар Руслан Кавалёў.