Аграрыі Кіраўскага раёна ўпэўнена завяршаюць чарговы сезон палявых работ
У сельгасарганізацыях у большасці завершаны асноўныя палявыя работы. На парадку дня зараз – уздым зябліва, які накіраваны ўжо на ўраджай наступнага года.
Актыўнымі тэмпамі вядуць восеньскае ворыва ў ААТ “Дабаснянскае”. З планавых 890 га глеба ўзарана на амаль 700 га. Хаця, спыняцца на дасягнутым у гаспадарцы не збіраюцца: пакуль надвор’е будзе спрыяць палявым работам, гэты від будуць працягваць і звыш плана.
– Дадзены тэхналагічны прыём мае вялікае значэнне, – паясніў галоўны аграном сельгаставарыства Андрэй Голубеў. – Ён дазваляе зменшыць напружанасць падчас веснавых палявых работ, забяспечвае найбольш якасную перадпасяўную апрацоўку глебы і спрыяе правядзенню веснавой сяўбы сельскагаспадарчых культур у лепшыя агратэхнічныя тэрміны. Чым больш уздымем, узаром глебы з восені, тым лягчэй будзе ўжо вясною пасеяць астатнія культуры. Таму мы надаем гэтаму віду сельгасработ не менш важнае значэнне, як і іншым, і імкнемся арганізаваць працэс у поўнай меры.
Работы па восеньскаму ворыву вядуць дабаснянцы з раніцы і да позняга вечара. Зараз на магутным “Беларусу-3022” з дапамогай 8-корпуснага плуга ўзворвае ўчасткі Андрэй Смалоўскі. Плануецца ў хуткім часе яшчэ больш паскорыць тэмпы – далучыць да работ яшчэ адзін трактар – “Беларус-3522”. А дагэтуль на ворыве шчыравалі механізатары Уладзімір Скрыганаў і Андрэй Назарчык, якія падрыхтавалі глебу пад восеньскую сяўбу. А яе, да слова, у “Добасна-агра” правялі аператыўна, у аптымальныя тэрміны. Азімыя культуры на зерне размясцілі на 1290 га, на зялёны корм – 313 га, насенннем рапсу занялі 330 га, сурэпіцай – 20 га. Усю сяўбу правялі вопытныя механізатары Міхаіл Куляновіч на трактары “Атлес” і Алег Сосаў на трактары “Беларус-3022”.
Апошні з названых паралельна яшчэ і рыхтаваў глебу культыватарам. Мінеральныя тукі пад сяўбу ўносіў Рыгор Шэлегаў.
Поўнасцю завершана ў гаспадарцы ўборка кукурузы на сілас. Як адзначыў Андрэй Голубеў, выдалася яна неблагая: па 267 цэнтнераў зялёнай масы на круг. З 520 га на жывёлагадоўчых аб’ектах заклалі 5 сіласных траншэй, плюс яшчэ адну з траў. На здрабненні кукурузы выдатна папрацавалі механізатары Сяргей Сямёнаў і Канстанцін Калаткоў.
Большым, чым у мінулым годзе, атрымаўся ўраджай і цукровых буракоў. Зараз выкапаныя салодкія карані вывозяцца для адпраўкі на Слуцкі цукрова-рафінадны камбінат.
Нялішнім будзе заўважыць, што дабаснянцы, дбаючы пра ўласны ўраджай, дапамагалі калегам, прычым не толькі ў нашым раёне. Выдзялялі тэхніку для адвозкі бульбы, зялёнай масы і іншых ураджайных грузаў у ААТ “Рассвет імя К.П.Арлоўскага”, ААТ “Александрыйскае” Шклоўскага раёна, а ў гэтыя дні дабаснянскі кормаўборачны камбайн заняты на кукурузных палетках у КСУП “Аўсянка імя І.І.Мельніка” ў Горацкім раёне. Як кажуць, поле суседа не чужое…
Аляксандр ХАХЛОЎ.
Фота аўтара.
На фота: механізатар Андрэй Смалоўскі якасна вядзе зябліўнае ворыва.