У КСУП “Ніва-Барсукі” адбыўся справаздачны сход, на якім былі падведзены вынікі мінулага года, прааналізаваны дасягнутыя поспехі, вызначаны шляхі павышэння прадуктыўнасці працы, а таксама акрэслены задачы на год бягучы. Удзел у справаздачы прынялі першы намеснік старшыні райвыканкама – начальнік упраўлення па сельскай гаспадарцы і харчаванні Сяргей Дарошкін і старшыня раённай прафсаюзнай арганізацыі работнікаў АПК Віктар Ставер.

Падводзячы вынікі мінулага года, старшыня сельгаспрадпрыемства Іван Рыняк адзначыў, што ён для гаспадаркі стаў даволі паспяховым. Па выніках штогадовага спаборніцтва галін народнай гаспадаркі раёна за 2023 год калектыў КСУП “Ніва-Барсукі” прызнаны пераможцам у намінацыі “Эканамічная эфектыўнасць сельскагаспадарчай вытворчасці”. У ліку лідараў гаспадарка ў намінацыях “Вытворчасць цукровых буракоў”, “За павелічэнне вытворчасці і рэалізацыі мяса”, другое месца – “За павелічэнне вытворчасці і рэалізацыі малака”. Першае месца на рахунку ніваўцаў за лепшае добраўпарадкаванне прылягаючых тэрыторый. Лепшым механізатарам прызнаны трактарыст-машыніст Алег Сакабіцкі, лепшым работнікам бухгалтарскай службы стала галоўны бухгалтар гаспадаркі Наталля Няфёдава.

Асноўным накірункам дзейнасці сельгаспрадпрыемства з’яўляецца вытворчасць сельгаспрадукцыі. Стабільная і зладжаная работа калектыву дазваляе дасягаць добрых вытворчых паказчыкаў. Летась рост валавай прадукцыі склаў 102,8%, а прадукцыі жывёлагадоўлі –108,7%.
Нядрэнна спрацавалі раслінаводы: больш паказчыка 2022 года атрымалі рапсу, бульбы накапана 1552 т (290% да пазалеташняга), цукровых буракоў 9258 т (135%). Па аб’ектыўных прычынах недабралі збожжавых культур, у той жа час добра спрацавалі па нарыхтоўцы кармоў. Напрыклад сенажа мелі 14866 т ці 129,9%, усяго было нарыхтавана 43 ц.к.адз. на ўмоўную галаву БРЖ, з іх травяністых – 26,9 ц.к.адз.