Пытанні работы галіны жывёлагадоўлі раёна за студзень – люты бягучага года, вырашэнне якіх здольна павысіць эфектыўнасць жывёлагадоўлі, абмеркавалі на чарговай нарадзе кіраўнікі і галоўныя зааветспецыялісты сельгасарганізацый на чале са старшынёй райвыканкама Галінай Слабоднікавай.

Пачалося мерапрыемства на базе адной з МТФ КСУП “Барчыцы-агра”. Першы намеснік старшыні райвыканкама – начальнік упраўлення па сельскай гаспадарцы і харчаванні Сяргей Дарожкін давёў да ведама ўдзельнікаў нарады патрабаванні да захавання на фермах санітарных норм і правілаў, выключэння выпадкаў наведвання аб’ектаў староннімі людзьмі. Асаблівыя патрабаванні – да агароджы вытворчых памяшканняў. Справа ў тым, што бадзяжныя сабакі і каты, а таксама дзікая жывёла могуць быць пераносчыкамі розных захворванняў. Сяргей Дарожкін запатрабаваў тэрмінова правесці работы па ўладкаванні агароджы вакол ферм і комплексаў, дзе дагэтуль яе не было, а дзе ёсць – праверыць на цэласнасць і ў выпадку неабходнасці адрамантаваць.

Удзельнікам нарады прадэманстравалі, як павінны быць абсталяваны дэзбар’еры на ўездзе на тэрыторыю фермы ці комплексу, якія ветпрэпараты выкарыстоўваюцца для апрацоўкі тэхнікі, маючай права заехаць на тэрыторыю жывёлагадоўчых аб’ектаў, яны пазнаёміліся з парадкам вядзення журнала, дзе рэгістрыруюцца асобы, якія заходзяць ці заязджаюць на МТФ. Кіраўнікам сельгасарганізацый даручана на кожнай ферме прадпрыняць такія ахоўныя меры, каб не дапусціць узнікнення небяспечнай для жывёлы хваробы.

У зале пасяджэння райвыканкама было абмеркавана пытанне работы жывёлагадоўчай галіны з пачатку года. Намеснік начальніка райсельгасхарчу па жывёлагадоўлі Іван Грышчанка падрабязна расказаў, як спрацавалі сельгасарганізацыі раёна па вытворчасці прадукцыі жывёлагадоўлі.
Так, за студзень – люты сельгасарганізацыямі атрымана 13286 т малака, што склала 109,2% да адпаведнага перыяду 2023 года, у тым ліку за люты – 113,8%. Варта адзначыць, што практычна ўсе гаспадаркі плюсуюць у параўнанні з мінулым годам. Адпаведна з вытворчасцю малака ўзрасла і яго рэалізацыя: з пачатку года на перапрацоўчае прадпрыемства адпраўлена 12247 т (109,9% да студзеня – лютага 2023 года). Аднак некалькі гаспадарак знізілі таварнасць малака: ААТ “Дабаснянскае”, КСУП “Барчыцы-агра” і “Жылічы”. Кіраўнікам гэтых сельгасарганізацый даручана выправіць негатыўную сітуацыю.

Па стане на 1 сакавіка пагалоўе буйной рагатай жывёлы ў раёне складала 35402 галавы (+833 галоў да леташняга паказчыка), у тым ліку 11200 кароў (+305). З пачатку года было атрымана 2120 галоў прыплоду БРЖ – гэта вышэй мінулагодняга паказчыка на 189. У той жа час не выканалі даведзеныя заданні КСУП “Жылічы” і СГФ “Чыгірынка”. Галіна Слабоднікава дала даручэнне кіраўнікам і спецыялістам вышэйназваных гаспадарак прааналізаваць прычыны недаатрымання прыплоду БРЖ і ў далейшым не дапускаць падобнага.

Як заўважыў Іван Грышчанка, з пачатку года раён атрымаў 611 г сярэднесутачных прываг БРЖ, а гэта +71 г да студзеня – лютага 2023 года. Найбольшых паказчыкаў дасягнулі жывёлаводы ААТ “Рассвет імя К.П.Арлоўскага” (+222 г). У той жа час знізілі гэты паказчык КСУП “Чырвоны баец” (-81 г), ААТ “Дабаснянскае” (-68 г) і КСУП “Жылічы” (-37 г). Па словах спецыяліста, найбольшым чынам паўплывала на недаатрыманне прадукцыі, незахаванне ў поўнай меры тэхналогіі вытворчасці, догляду і лячэння БРЖ.

Аналізуючы вытворчыя паказчыкі жывёлагадоўчай галіны, Іван Леанідавіч адзначыў, што станоўчыя вынікі ёсць, але хацелася б, каб яны былі лепшымі, бо ад гэтага залежыць фінансавае становішча гаспадарак, іх магчымасць развівацца, павышаць заробкі працаўнікам. Каб гэтага дасягнуць, павінна быць агульная зацікаўленасць і кіраўнікоў, і галоўных спецыялістаў, і работнікаў, бо там, дзе праблему бачаць і своечасова вырашаюць, усё атрымліваецца.

Абмеркавалі пытанні аднаўлення статка, лячэння жывёлы, спосабы матэрыяльнага заахвочання жывёлаводаў і спецыялістаў, як адну з мер паляпшэння прадукцыйнасці працы работнікаў і іх адказнасці за сваю справу.

Людміла СЯМЁНАВА. Фота аўтара.