У чарадзе восеньскіх клопатаў сяльчан рабочы рытм назіраецца на многіх участках. Сабраць усё вырашчанае – тое, у што ўкладвалася праца многіх людзей на працягу ўсяго сезона, – галоўная задача дня.

Сапраўдным калейдаскопам выглядаюць у гэтыя вераснёўскія дні дзеянні працаўнікоў ААТ “Рассвет імя К.П.Арлоўскага”, якія выходзяць на фінішную прамую сельскагаспадарчага года. Напрыканцы мінулага тыдня мы наведалі розныя рассветаўскія ўчасткі, і паўсюль назіраліся высокая арганізацыя працы, тэмпы і, безумоўна, выдатнае стаўленне саміх рассветаўцаў да работ.

Як нам расказаў аграном-хімік сельгасарганізацыі Андрэй Скраблевіч, большасць атрыманага сёлета ўраджаю парадавала. Для таго, каб так атрымалася, на розных этапах вытворчых працэсаў былі захаваны неабходныя тэхналагічныя прыёмы. Усё, што залежала ад працаўнікоў, свое-
часова выканана. Дзесьці ўмешвалася ў гэтыя працэсы надвор’е, але скардзіцца на неспрыяльныя пагодныя ўмовы – не ў звычках рассветаўцаў.

Парадавалі цукровыя буракі, якія размяшчаліся на 256 га. З к іх было накапана 12669 т пры ўраджайнасці амаль 500 ц/га. Пры базіснай цукрыстасці 16% рассветаўскія салодкія карані выйшлі саладзейшымі – 17,36%. Усе караняплоды былі адпраўлены на Слуцкі цукроварафінадны камбінат, і цяпер па праву можна чакаць істотную фінансавую прыбаўку.

З выдатным настроем рассветаўцы завяршылі ўборку бульбы. Ураджай другога хлеба таксама выйшаў больш важкім, чым у мінулым годзе. З 350 га накапана больш за 18000 т (летась было 12 тыс.т). Сярэдняя ўраджайнасць – 528 ц/га. Уся бульба праходзіць сартыроўку на сховішчы. Частка яе адпраўляецца на корм жывёле на фермах, а асноўная маса закладваецца ў сховішчы для далейшай рэалізацыі ў гандлёвых кропках.

Ударныя сілы механізатарскіх кадраў накіраваны на ўборку кукурузы. На зерне завяршаюць абмалот камбайнеры Мікалай, Анатоль і Андрэй Дразды, Іван Калееў. Яны ўбралі царыцу палёў на 674 га, з якіх намалацілі 4660 т залацістага насення. Ураджайнасць – выдатная: па 70 цэнтнераў на круг выходзіць.

Паралельна шчыруюць на тэхніцы механізатары і вадзіцелі, убіраючы кукурузу на сілас. Убрана культура на 2223 га, яшчэ засталося здрабніць і перавезці – са 185 га. Ураджайнасць зялёнай масы – 297 ц/га. Адразу трыма кормаўборачнымі камбайнамі здрабняюць масу механізатары Міхаіл Вербенка, Канстанцін Пятруша і Ігар Жалдак. На адвозцы хутка завіхаецца атрад з амаль дзясятка трактароў з прычэпамі і аўтамашын.

Паклапаціліся рассветаўцы пра будучы ўраджай. Своечасова і якасна была праведзена сяўба азімых культур, якія размешчаны на 2863 га, – ячменю, пшаніцы, трыцікале, зерневых на зялёны корм, рапсу. Амаль усе палеткі засяваў Дзмітрый Кахновіч. Актыўна вядзецца ворыва пад зябліва, уносяцца мінеральныя ўгнаенні.

Адной з візітных картак “Рассвета” застаецца агароднінаводства. Як нам паведаміў аграном Іван Фядотаў, які адказвае ў сельгасарганізацыі за гэтую сферу сельскай гаспадаркі, поўнасцю завершана ўборка цыбулі, сталовых буракоў, морквы. З цыбульных плантацый, якія займалі 70 га, атрымана 2196 т залацістых галовак пры ўраджайнасці 310 ц/га. Увесь ураджай пакладзены на захоўванне ў сховішчы. Як, дарэчы і сталовыя буракі, ураджайнасць якіх выйшла па 430 цэнтнераў з кожнага з 18 га. На такой жа плошчы была размешчана і морква, якая таксама ўрадзіла: па 550 цэнтнераў на круг атрымалі рассветаўцы. На ўборку яе былі задзейнічаны работнікі практычна з усіх падраздзяленняў гаспадаркі, а таксама часова занятыя работнікі з Кіраўска і Бабруйска, з якімі “Рассвет” своечасова разлічваўся за выкананыя работы.

Надышла чарга і ўборкі “каралевы агародніны” – так іншы раз называюць капусту. Дакладней, ранняя і сярэдняспелая была ўбрана і рэалізавана ўжо даўно, а зараз прыступілі да позняй.

Уся атрыманая агародніна паступае ў сховішчы сельгаставарыства і чакае адпраўкі ў гандлёвыя кропкі – як уласныя, так і іншыя. Першыя партыі ўжо праходзяць перапрацоўку і пакуюцца ў спецыяльную тару. Спажыўцы гатовы набыць свежую рассветаўскую прадукцыю.

Аляксандр ХАХЛОЎ.
Фота аўтара.