Маладога жывёлавода малочнатаварнай фермы «Віленка» філіяла СВК «Бераснёўскі» ААТ «Кіруючая кампанія холдынгу «Бабруйскаграмаш» Вячаслава Бабіча мы заспелі за працай. Каб з ім пагутарыць, давялося пачакаць, пакуль ён падсцілаў каровам у стойлах, каб тым было камфортна адпачываць.

На МТФ малады чалавек працуе трэці год. Нарадзіўся і вырас у Баравіцы. Пэўны час спрабаваў уладкаваць сваё жыццё ў Мінску, аднак вярнуўся на малую радзіму, як толькі ў іх з жонкай нарадзіўся сынок Марк. Бабічы вырашылі гадаваць сына ў родным раёне, побач з бацькамі і блізкімі. Нездарма ж кажуць: дома і сцены дапамагаюць.

Для маладых мужа і жонкі, такіх як Бабічы, стабільная работа і годная заработная плата адыгрываюць ключавую ролю. На ферме маладога чалавека прынялі добра: у жывёлагадоўлі заўсёды патрэбны энергічныя работнікі. Тым больш, што з працай жывёлавода Вячаслаў быў знаёмы з дзяцінства – у гэтай галіне шчыруе яго мама, часта дапамагаў ёй, таму навыкі былі.

Праца жывёлавода цэніцца высока, але для таго, каб атрымаць максімальную аддачу – добрыя вытворчыя паказчыкі і, адпаведна, добрую зарплату, трэба пастарацца.

пачынаецца з 8 раніцы. За ім замацавана 230 галоў. Заступаючы на змену, жывёлавод адразу ж бярэцца за чыстку кармушак і навядзенне парадку ў стойлах. Дарэчы, падтрыманню патрэбных санітарных умоў і захаванню гігіены на працоўным месцы ён надае асаблівае значэнне. Займаецца кармленнем, паеннем кароў, падсцілае свежую салому. Такая праца патрабуе і фізічнай вынослівасці, і цярпення, і адказнасці, і, што нямала важна, павагі да жывёлы, бо ў кожнай рагулі свая індывідуальнасць, і для падтрымання дабрабыту і здароўя статка добры жывёлавод абавязаны гэта ўлічваць. Такі падыход важны для паспяховага развіцця і росту жывёлы.

Кіраўніцтва адклікаецца аб маладым жывёлаводзе, як аб энергічным і добрасумленным працаўніку, якому можна даручыць любую справу і быць упэўненым, што яна будзе выканана ў тэрмін і якасна.

Яўгенія БЯЛЬКО.