У чарадзе летніх клопатаў завіхаюцца на палях працаўнікі КСУП «Чырвоны баец». Пара стаіць гарачая і ў прамым, і ў пераносным сэнсе.
Без рэпетыцый сёлета давялося прыступіць да ўборкі каласавых: азімы ячмень не змог наліцца пад гарачым сонцам, а дожджыка нябесная канцылярыя ўпарта не прадастаўляла да адносна нядаўняга часу. Вось і трэба было тэрмінова ўбіраць тое, што вырасла. Дырэктар сельгасарганізацыі Сяргей Лянкевіч у размове не без жалю канстатаваў, што ўраджайнасць сёлетняга ячменю выйшла на круг па 28 цэнтнераў, хоць летась ён парадаваў 55-цю з гектара. Як кажуць, каментарыі залішнія… Усяго ж у «Чырвоным байцы» было ўбрана 205 га з якіх намалацілі 570 т.

А пакуль астатнія збожжавыя і зернебабовыя даспяваюць, у гаспадарцы не спыняецца касавіца. Першым укосам у сянажныя траншэі закладзена 5580 т зялёнай масы. Паралельна назапасілі 296 т сена. Зараз механізатары і вадзіцелі заняты на нарыхтоўцы траў другім укосам. Плануецца дадаць у траншэі яшчэ прыкладна 2,5 тыс. т сенажу. Хоць, як адзначыў кіраўнік, да даведзенага плана ў 13 тыс.т дацягнуць наўрад ці атрымаецца: зноў жа без дажджоў травастой выйшаў не такім, як разлічвалася.
Але нарыхтоўка кармоў наладжана належным чынам, убіраюцца падчыстую ўсе адведзеныя пад касавіцу ўчасткі. Учора, падчас нашага візіту ў гаспадарку, вялася ўборка канюшыны каля Новых Дваранінавіч.

Травы скошваюць з дапамогай дзвюх ротарных касілак механізатары Дзмітрый Аляксееў і Яўген Кандраценка. Падграбае ў валкі скошаную масу граблямі «Мillenium» Сяргей Бяляўскі. На здрабненні зялёнай масы на кормаўборачным камбайне КВК-800 старанна працуе Ігар Пацыенак (на фота). Хутка напаўняе ён прычэпы трактароў і кузавы аўтамашын. Чатыры адзінкі тэхнікі заняты на адвозцы масы да траншэй. Па чарзе суправаджаюць камбайн на трактарах Віктар Аляксееў і Аляксандр Масюковіч. Яшчэ 2 МАЗы выдзеліў для дапамогі «Аўтапарк-14».
На наступным тыдні плануюць у «Чырвоным байцы» прыступіць да ўборкі рапсу. Ды і каласавыя не адстаюць, даходзяць да поўнай спеласці. У гаспадарцы практычна ўсё гатова і да гэтай важнейшай палявой кампаніі. Усё вырашчанае трэба ўбраць да апошняга зярнятка!
Аляксандр ХАХЛОЎ.
Фота аўтара.

На верхнім фота: добрасумленна працуе на касьбе траў Яўген Кандраценка. Дарэчы, малады механізатар не толькі спраўна завіхаецца на рабочым месцы, а і выдатны гаспадар. Разам з жонкай Марыяй, якая працуе выхавацелем у дзіцячым садку, гадуюць траіх дзяцей. Сям’я Кандраценкаў актыўна ўдзельнічае ў грамадскім жыцці. Нядаўна яна стала пераможцай раённага конкурсу «Уладар сяла-2023» і прадстаўляла наш раён на абласным этапе.