Уборка ўраджаю – асаблівы час. Тут кожная хвіліна на вагу золата, і таму ніхто не дазваляе сабе расслабіцца. Камбайны выходзяць у поле, ледзь абсохне раса, і працуюць хлебаробы да позняга вечара. За штурвалам камбайнаў – вопытныя механізатары, для якіх уборачная кампанія – справа гонару. На адвозцы збожжа – вадзіцелі, якія дастаўляюць ураджай на збожжаток. Побач – аграномы, інжынеры і дыспетчары, якія сочаць за якасцю работ і лагістыкай.
Падчас уборкі ўся гаспадарка жыве ў адным рытме – рытме жніва. І нават тыя, хто не ў полі, не застаюцца ў баку: хто рыхтуе абеды, хто дапамагае на складзе, хто сочыць за тэхнікай. Гэта агульная справа, і ў гэтым – галоўная сіла вяскоўцаў.

У мінулую суботу супрацоўнік рэдакцыі пабываў на полі КСУП «Чырвоны баец», дзе ішла ўборка азімага ячменю, да якой прыступілі 7 ліпеня. Шырокая карціна сельскай працы: магутныя камбайны ўпэўнена праходзяць па залацістых палосах, акуратна зразаючы саспелыя каласы і запаўняючы бункеры збожжам новага ўраджаю.

На полі знаходзіўся і кіраўнік сельгаспрадпрыемства Сяргей Лянкевіч. Ён уважліва назіраў за ходам жніва, сачыў за тым, каб не згубіўся ні адзін колас – усё павінна трапіць у жняярку камбайна.
Ураджайнасць азімага ячменю складае 30 ц/га. На ўчарашнюю раніцу было ўжо ўбрана 87% уборачнай плошчы.

“Экіпажы ўкамплектаваны – усе камбайнеры вопытныя, працуюць не першы сезон, ведаюць сваю справу, – адзначыў Сяргей Лянкевіч. – У нас няма маладзёжных экіпажаў, але моладзь працуе ў пары з вопытнымі камбайнерамі: Ігар Макаронак – з Дзмітрыем Аляксеевым, Станіслаў Сенчукоў – з Аляксандрам Сіндаравым. Упэўнены, такі тандэм – лепшая школа для маладых механізатараў. Яны пераймаюць практычныя навыкі, вучацца хутка прымаць рашэнні ў палявых умовах, працаваць з тэхнікай граматна і беражліва. Тым самым мы фарміруем надзейную змену на будучыню. Хачу сказаць, што і камбайнеры, і вадзіцелі вельмі адказна ставяцца да выканання пастаўленых задач. Працуюць з поўнай аддачай – з самае раніцы і да позняга вечара, калі дазваляе надвор’е. Упэўнены, пры захаванні такіх тэмпаў, уборку мы завершым у аптымальныя тэрміны і без страт”.

Уборка ўраджаю – гэта цэлае жыццё, поўнае клопату аб зямлі, аб заўтрашнім дні. Тут, на палях КСУП “Чырвоны баец”, спее не толькі зерне, але і ўпэўненасць: з такой працай – і хлеб будзе, і дастатак у людзей.

Подробно в номере № 54 (10676).

Галіна РУСЕЦКАЯ.
Фота аўтара.