На ўчарашнюю раніцу каласавыя тут былі ўбраны на 66% плошчаў, адведзеных у сельгасарганізацыі пад збожжавыя і зернебабовыя культуры.

Самым першым, прычым тэрмінова, яшчэ ў пачатку ліпеня быў абмалочаны азімы ячмень. Гарачае майскае і чэрвеньскае сонца пры адсутнасці дажджоў не дазволіла ў поўнай меры наліцца ячменнаму коласу. Ураджай не змог парадаваць так, як летась: 28 цэнтнераў на круг супраць 55…
Зусім па-іншаму выспелі пшанічныя ўчасткі: з кожнага гектара атрымана па 44 цэнтнеры. Па 42 цэнтнеры збожжа на круг намалочваюць хлебаробы “Чырвонага байца” трыцікале.
За сухімі лічбамі стаіць карпатлівая праца многіх і многіх людзей. Прычым яшчэ з восені, а потым і вясны, калі быў закладзены падмурак пад ураджай, які зараз збіраецца да кожнага каласка. Прычым збіраецца ў няпростых умовах. У адрозненні ад мая і чэрвеня, ліпень, а цяпер і жнівень зачасціў дажджамі, стрымліваючы памкненні хлебаробаў. Таму апошнія выкарыстоўваюць кожную пагодную хвіліну.

Чатыры экіпажы збожжаўборачных камбайнаў шчыруюць на жніве. Усе механізатары – вопытныя і надзейныя, за плячамі ў многіх шмат сезонаў на ўборцы збажыны. У Дзмітрыя Аляксеева, да прыкладу, за штурвалам камбайна – больш за 2 дзясяткі год. Штогод ён з’яўляецца лідарам у гаспадарцы па намалотах. Вось і сёлета разам з маладым напарнікам Ігарам Макаронкам ён першым з квартэта экіпажаў сельгасарганізацыі дасягнуў тысячнага рубяжу па намалоту збожжа. Блізкія да гэтай знакавай мяжы экіпажы ў саставах бацькі і сына Аляксандра і Уладзіміра Макаронкаў, Дзяніса Казанцава і Аркадзя Цяніцкага. Старанна працуюць таксама Валерый Дырыкаў і Анатоль Шлык.

Трыма самазваламі свежанамалочанае збожжа дастаўляецца ад камбайнаў у сушыльную гаспадарку. Паўтары тысячы тон зерня перавёз Аляксандр Ермалаеў, амаль столькі ж на рахунку Юрыя Кітова. Набліжаецца да адзнакі ў тысячу тон збожжа Мікалай Аляксееў.
Не змаўкае гул рухавікоў на збожжатаку, дзе работа наладжана ў 2 змены. Зерне даводзяць да ладу Аляксандр Анісімаў і Вадзім Гукаў, Аляксандр Малахаў і Сяргей Гукаў.
Актыўна абжатыя палі вызваляюцца ад саломы. Механізатары Віктар Аляксееў і Аляксандр Масюковіч скручваюць яе ў рулоны, якія потым звозяцца да фермы ў Дваранінавічах і складваюцца ў сцірты.
Паралельна з уборкай сёлетняга ўраджаю думаюць у гаспадарцы пра ўраджай наступны. Літаральна ў бліжэйшыя дні плануюць у “Чырвоным байцы” распачаць сяўбу азімага рапсу. З гэтай мэтай актыўна вядзецца ворыва – на ўчастку заняты Яўген Кандраценка і Яўген Марцючэнка.
Наогул, усе работы арганізаваны на належным узроўні. Работнікі забяспечаны спецвопраткай, гарачым харчаваннем. Усё, што залежыць ад людзей, выконваецца. Застаецца толькі нябёсы прасіць, каб не перашкаджала надвор’е.

Аляксандр ХАХЛОЎ