Земляробы Кіраўшчыны паступова ўключаюцца ў веснавую палявую кампанію. Падкармліваюцца азімыя культуры, вывозіцца і ўносіцца арганіка. Праўда, на поўную моц разгарнуць палявыя работы пакуль атрымліваецца далёка не на ўсіх “франтах” – стрымлівае надвор’е.

У КСУП “Ніва-Барсукі”, да прыкладу, асноўны від праводзімых  работ – падкормка мінеральнымі тукамі пасеваў азімых культур. І гэта мажліва дзякуючы выкарыстанню лёгкіх самаходных машын “Раса”, якія на вялікіх гумавых колах шпарка імчаць па зазелянеўшым покрыве. Адна з такіх машын даўно працуе ў гаспадарцы, а другую набылі летась увосень і сёлета дэбютавала на палетках. Кіруюць машынамі механізатары Аляксандр Рымараў і Міхаіл Белаглазаў (на фота).Падвоз хімікатаў і запраўку іх ажыццяўляюць Аляксандр Петранкоў і Аляксандр Еўдакімаў. На ўчарашні ддзень на палях падкормлены КАСам пасевы азімай пшаніцы на 865 га і азімага ячменю на 200 га.

А вось прыступіць да выканання іншых відаў работ, як падзяліўся з намі пры сустрэчы галоўны аграном Сяргей Сіўчыкаў, яшчэ не ўяўляецца магчымым. Дужа глёўкая, набраклая вадой яшчэ глеба. Як толькі ўсталюецца спрыяльнае надвор’е, работы разгарнуцца на поўную моц. Аб’ёмы ў ніваўцаў даволі значныя, але ўсё гатова, каб дынамічна іх выканаць: падрыхтавана тэхніка, пад патрэбу кандыцыйнае насенне, запас паліва, а галоўнае – людзі, якім не церпіцца ўліцца ў працоўны працэс.