Як паведамілі рэдакцыі ва ўпраўленні па сельскай гаспадарцы і харчаванні райвыканкама, па стане на 21 ліпеня ўсе сельскагаспадарчыя арганізацыі Кіраўскага раёна завяршылі ўборку азімага ячменю. Уборачныя работы былі праведзены на агульнай плошчы 2935 гектараў, сярэдняя ўраджайнасць склала 37 цэнтнераў з гектара. Усяго аграрыямі намалочана 10,8 тысячы тон збожжа.

Цяпер хлебаробы чакаюць спрыяльных умоў надвор’я для пачатку ўборкі азімага рапсу, пасяўная плошча якога – 3150 гектараў. Для гэтага плануецца задзейнічаць 30 збожжаўборачных камбайнаў, аснашчаных спецыяльнымі рапсавымі сталамі (прыстасаванне, якое мацуецца да жняяркі камбайна і дазваляе значна знізіць страты насення рапсу падчас уборкі, а таксама павысіць хуткасць і эфектыўнасць працы).
Працягваецца штогадовае раённае працоўнае спаборніцтва на Жніве-2025. На працягу некалькіх дзён лідарскія пазіцыі ў ім займаюць хлебаробы ААТ «Рассвет імя К.П.Арлоўскага». Больш за ўсіх збожжа намалаціў сямейны экіпаж збожжаўборачнага камбайна ў складзе братоў Мікалая і Анатоля Драздоў – 429,1 тоны. Сярод вадзіцеляў тон задае Сяргей Іваніцкі, які перавёз 796,3 тоны збожжа.
Адначасова працягваецца нарыхтоўка кармоў, уборка саломы і падрыхтоўка глебы пад будучую сяўбу.

Яўгенія БЯЛЬКО.