Вітамінная прадукцыя круглы год
Нарыхтоўка садавіны і агародніны, дзікарослых ягад, грыбоў – адзін з галоўных накірункаў дзейнасці аддзела нарыхтовак райспажыўтаварыства ў летне-асенні перыяд, зімой нарыхтоўшчыкі дбаюць пра разнастайнасць і багацце вітаміннай прадукцыі на сталах пакупнікоў.
З пытаннем, наколькі спажыўцы былі забяспечаны садавінай і агароднінай у міжсезонны перыяд, мы звярнулася да намесніка старшыні праўлення райспажыўтаварыства Мікалая ЕРМАКОВА:
– Важна не толькі нарыхтаваць садавіну і агародніну, але і якасна яе захаваць.
Першым этапам гэтай работы стала правядзенне дэзінфекцыі сховішчаў, іх рамонт і пабелка. Санэпідэмслужба праверыла падрыхтоўку аб’ектаў і выдала неабходныя дакументы. Адзначу, што ў складскіх памяшканнях нарыхтоўчай базы створаны належныя ўмовы для захоўвання, ёсць камеры з халадзільнымі ўстаноўкамі, якія падтрымліваюць неабходную тэмпературу для кожнага віду прадукцыі, а гэта дазваляе нам прапаноўваць пакупнікам якасныя тавары на працягу ўсяго міжсезоннага перыяду. Усе даведзеныя планы па закладцы стабілізацыйнага фонду былі выкананы ў поўным аб’ёме.
Агародніна рэалізуецца ў асноўным у гандлёвую сетку нашага і суседняга Бабруйскага раёнаў, а таксама ва ўстановы, якія з намі супрацоўнічаюць, частку рэалізуем падчас праводзімых у раёне, вобласці і рэспубліцы кірмашоў, працуем з індывідуальнымі прадпрымальнікамі. Тыя ж яблыкі, у адпаведнасці з дагаворамі, пастаўляем на перапрацоўчыя прадпрыемствы. Таварныя яблыкі прапануем нашым пакупнікам.
Аддзел нарыхтовак не толькі закупляе сельгаспрадукцыю, але і ажыццяўляе яе частковую перапрацоўку. Імкнемся забяспечыць усе пажаданні спажыўцоў. У Бабруйску ёсць квасільна-засолачны ўчастак, дзе перапрацоўваецца свежая прадукцыя, вяртаючыся на прылаўкі магазінаў, у рэстараны і кафэ квашанай і мачонай прадукыяй. Квашаныя агуркі, памідоры, капуста, мочаныя яблыкі, морква “па-карэйску”, буракі марынаваныя – гэтыя прысмакі ў нашых пакупнікоў карыстаюцца асаблівай папулярнасцю і, як гаворыцца, ідуць на “ўра”. Індывідуальныя прадпрымальнікі актыўна бяруць на рэалізацыю нашы мочаныя яблыкі. Калі ў мінулым годзе зрабілі 5 т гэтай прадукцыі, то сёлета больш за 18 т.
Сярод асноўных пастаўшчыкоў садавіны і агародніны – насельніцтва, фермерскія гаспадаркі, штосьці закупляем у сельгасарганізацыях.
З мэтай выканання даведзеных паказчыкаў па закупе раслінаводчай прадукцыі выязджаем у іншыя вобласці, часцяком бываем у Альшанах Столінскага раёна Брэсцкай вобласці, дзе фермерамі наладжаны аптовы продаж вырашчанай прадукцыі, бываем на рынках. Ва ўсіх гандлёвых аб’ектах размяшчаецца інфармацыя аб закупачных цэнах на сельгаспрадукцыю, якія перыядычна мяняюцца ў залежнасці ад сезону, ураджайнасці, прапановы і попыту. Усё гэта дазваляе нам набываць якасныя тавары па прымальных цэнах і прапанаваць іх пакупнікам.
Уся прадукцыя, незалежна ад таго, дзе была вырашчана, перш чым трапіць у магазіны і на нарыхтоўчы канвеер, а пасля – на сталы спажыўцоў, праходзіць праверку. Частка з кожнай партыі прадукцыі спачатку правяраецца нашымі спецыялістамі, потым адпраўляецца ў ветлабараторыю г.Бабруйска. Там агародніна і садавіна правяраецца на нітраты, а дзікарослыя культуры – на радыяцыю. Ураджай, які не адпавядае патрабуемым нормам, выбракоўваецца. Таксама штогод робім расшыраны пратакол па ўсіх паказчыках на прадукцыю, якая закладваецца ў стабілізацыйны фонд. Таму спажыўцы могуць быць спакойныя, уся наша прадукцыя якасная і бяспечная.
У сезон забяспечваем жыхароў раёна фруктамі і ягадамі, прапануем пакупнікам кавуны, дыні, вінаград, персікі, гранаты і іншае, наладжваем кантакты з пастаўшчыкамі гэтай прадукцыі, штосьці набываем праз камерцыйныя фірмы, галоўнае, каб кіраўчане мелі шырокі выбар вітаміннай прадукцыі.
Немалаважны аспект у нашай рабоце – нарыхтоўка другаснай сыравіны. Закупаем лом чорнага і каляровага металаў, макулатуру, а яшчэ шклабой, поліэтылен, бутэлькі. Летась пачалі закупаць бытавую тэхніку: тэлевізары, халадзільнікі, пральныя машыны, пыласосы і іншае. Сярод актыўных здатчыкаў другаснай сыравіны – насельніцтва, школы і дзіцячыя садкі, арганізацыі раёна.
На нарыхтоўцы як другаснай сыравіны, так і дароў садоў, агародаў, лясоў задзейнічаны штатныя і пазаштатныя нарыхтоўшчыкі. Пастаянна працуюць 32 чалавекі ў нашым раёне, Бабруйскім, Рагачоўскім і ў Асіповічах. Кожны з іх старанна ставіцца да сваіх абавязкаў, бо матэрыяльна зацікаўлены ў тым, каб сабраць найбольшую колькасць прадукцыі і другаснай сыравіны.
Падводзячы вынікі размовы, паўтаруся, што нашы спажыўцы могуць быць спакойныя: садавінай і агароднінай аддзел нарыхтовак райспажыўтаварыства забяспечыць насельніцтва пад поўную патрэбу.
Запісала Людміла СЯМЁНАВА. Фота аўтара.