У філіяле «СВК «Бераснёўскі» ААТ «Упраўляючая кампанія холдынгу «Бабруйскаграмаш» поўным ходам ідуць палявыя работы – сяўба яравых збожжавых і зернебабовых культур. Нараўне з сяўбой механізатары выконваюць увесь комплекс мерапрыемстваў: транспарціроўка і ўнясенне арганічных угнаенняў, узворванне і рыхленне глебы, падкормка азімых культур. Увесь працэс арганізаваны згодна з агратэхнічнымі патрабаваннямі, каб забяспечыць высокі ўраджай у будучым.

У мінулую пятніцу мы пабывалі на сельгаспалетках «Бераснёўскага» і паглядзелі, як ідзе вясновая гарачая пара.

Асаблівая ўвага тут надаецца падрыхтоўцы глебы. Гэты этап лічыцца адным з ключавых для паспяховага вырошчвання сельскагаспадарчых культур. Апрацоўкай поля каля в.Новы Гарадок займаўся адзін з вопытных работнікаў гаспадаркі Віктар Скрыпуноў. Яго шматгадовы стаж дазваляе выконваць работу якасна і аператыўна. Механізатар адзначыў, што немалаважную ролю адыгрывае выкарыстанне сучаснай сельгастэхнікі. Летась філіял набыў новыў трактар, на якім Віктар шчыруе з задавальненнем.
На суседнім полі Генадзь Доўкша вёў сяўбу зернебабовай сумесі.
Дырэктар сельгасфіліяла Аляксей Арцёмчык і намеснік дырэктара Сяргей Ласенка асабіста кантралявалі ход сяўбы. Генадзь Доўкша мае вялікі стаж работы ў сельскай гаспадарцы – каля 30 гадоў. Лічыць, што на тэмп сёлетняй сяўбы ўплывае няўстойлівае надвор’е, але за сваю працоўную біяграфію ён навучыўся спраўляцца з цяжкасцямі, добра ў яго атрымліваецца манеўраваць на вясновым полі, каб эфектыўна і якасна выканаць пастаўленую задачу.
Аляксей Арцёмчык адзначыў важнасць своечасовага выканання ўсіх аграрных аперацый. Механізатары штодзень выходзяць на палеткі, дзе кожны выконвае сваю справу. Але галоўнае правіла застаецца нязменным: паспець зрабіць усё своечасова, інакш можна страціць ураджай.
Алег Грынфельд, вопытны механізатар з 25-гадовым стажам, задзейнічаны на падвозцы насення. Для яго сельская гаспадарка – справа ўсяго жыцця, бо ён нарадзіўся і вырас у вёсцы. Нягледзячы на неспрыяльныя ўмовы надвор’я, якія часам запавольваюць тэмпы работ, Алег і яго калегі ўмеюць і імкнуцца максімальна эфектыўна выкарыстоўваць кожную пагодную хвіліну.
Згодна з планам, зернебабовымі сумесямі працаўнікам «Бераснёўскага» трэба засеяць 320 гектараў. На момант нашага візіту ў сельгасфіліял ужо была закрыта сяўба аўса на 50 гектарах, столькі ж пасеяна ячменю, які ў выніку зойме 80 гектараў. Наперадзе яшчэ значныя аб’ёмы работ, уключаючы пасадку аднагадовых траў.
Азімыя культуры займаюць 1030 гектараў – на зерне, а яшчэ 300 –прызначаны для зялёнага корму. Паводле слоў Сяргея Ласенкі, азімыя паспяхова перанеслі зімоўку, дзякуючы чаму страты мінімальныя. Таксама намеснік дырэктара падкрэсліў, што цяжкасцей
у арганізацыі і правядзенні сяўбы пакуль не ўзнікае, усё ідзе па графіку. Механізатары працуюць з сямі раніцы да сямі вечара, імкнучыся максімальна выкарыстоўваць спрыяльныя ўмовы надвор’я.
Народная мудрасць кажа: «Вясновы дзень год корміць», і бераснёўцы робяць усё магчымае, каб гэты прынцып апраўдаўся.
Яўгенія БЯЛЬКО.
Фота аўтара.