У ААТ “Рассвет імя К.П.Арлоўскага” пабываць на ўсіх участках, дзе вядуцца палявыя работы, за адзін заход даволі праблематычна. На будучы ўраджай на абшарах самай буйной гаспадаркі раёна працуе цэлая армія земляробаў. І кожны з іх у адказе за свой участак работы і з тонкім веданнем палявой навукі. У гэтым мы ў чарговы раз упэўніліся, наведаўшы толькі некаторыя з палеткаў сельгасарганізацыі і пагутарыўшы са спецыялістамі і механізатарамі.

Першага намесніка дырэктара “Рассвета” Аляксандра Жылінскага мы сустрэлі на полі за Валосавічамі. Ён асабіста кантраляваў ход сяўбы, уважліва назіраючы, як штатны рассветаўскі сейбіт Дзмітрый Кахновіч на магутным “Джон Дзіры” з шыроказахопным пасяўным агрэгатам “Solitair-12” шпарка пакідаў за сабой роўненькія рады з закладзеным у іх насеннем.

– Сёлета амаль што на месяц раней распачалі сяўбу, стартавалі 27 сакавіка, – расказаў Аляксандр Валянцінавіч. – Вясна выдалася ранняй у адрозненні ад леташняй. Да канца бягучага тыдня план будзе закрыты. У клін ранніх яравых увойдуць 595 га ячменю гатунку “карнет”, 50 га проса, 538 га зернебабовых. Асноўныя ж плошчы збожжавых былі закладзены з восені – азімыя займаюць плошчы ў тры разы большыя.

У хуткім часе да ўскрайку пад’ехаў і Дзмітрый Кахновіч – за новай запраўкай насення. Аператыўна ў бункер сеялкі пасыпалася зерне. Гэта Алег Паўлюц у імгненне вока падключыўся да працэсу. Алег Вікенцьевіч на ўсіх работах выдатна працуе. Яго “каронка” звычайна – пасадка расады капусты. Зусім не за гарамі гэты від яго дзейнасці, расада рыхтуецца ў цяплічным камбінаце гаспадаркі.
У гэты ж момант пад’ехаў да нас яшчэ адзін магутны трактар – “Massey Ferguson”. За рулём – Ігар Жалдак, ён рыхтуе культыватарам глебу да пасеву.

– Скончым сеяць збожжавыя і зернебабовыя і пераключуся на кормаўборачны камбайн, – паведаміў механізатар. – Свірэпіца з жытам пад такім цёплым надвор’ем хутка бягуць у рост. Ужо настае час і сянаж закладваць. Сёлетняй вясной ідзе станоўчая дынаміка на палях – толькі паспявай!..

Больш чытайце на старонках “Районнай газеты “Кіравец””.