Стабільнасць і зладжанасць у рабоце заўсёды вызначаюць жывёлаводаў СГФ “Чыгірынка” РУП “Беларуснафта-Магілёўаблнафтапрадукт”. На працягу шэрагу год сельгасфіліял – у ліку лепшых у раёне па вытворчасці малака, атрыманні прадукцыі высокай якасці. Асноўнае правіла, якога прытрымліваюцца ў гаспадарцы на кожнай ферме, – захаванне тэхналагічных патрабаванняў. З кожным годам мясцовым жывёлаводам удаецца не толькі захоўваць, але і пераўзыходзіць атрыманыя высокія вынікі. Асаблівая ўвага надаецца збалансаванасці кармоў, здароўю цялушак, а таксама будучага прыплоду. Жывёла своечасова вакцынуецца, атрымлівае вітамінна-мінеральныя комплексы, якія дазваляюць выгадаваць цялят з моцным імунітэтам, а ў будучым – атрымаць высокаўдойных кароў. Кантроль за ўсімі гэтымі працэсамі з боку спецыялістаў вельмі строгі.

Так, у 2024 годзе ад кожнай каровы тут надаілі па 7716 кг малака, рэалізацыя склала 100,4% да 2023 года. Усё атрымліваемае малако – гатункам “экстра”. Нядрэнна спрацавалі і па вытворчасці мяса: атрымалі на 494 ц больш паказчыка 2023 года (110,6%). З “плюсам” у 24 грамы спрацавалі і па сярэднесутачных прывагах (104,5%).
Сёлета жывёлаводы сельгасфіліяла працуюць над паляпшэннем дасягнутых вынікаў. Так, за студзень вытворчасць малака да студзеня 2024 года склала 108,5%, рэалізацыя – 108,2%, уся прадукцыя гатункам “экстра”. Задаволены ў сельгасфіліяле і вытворчасцю мяса: паказчык студзеня 2025 года складае 122,9%. Растуць і сярэднесутачныя прывагі: у студзені бягучага года яны склалі 583 г (112%).
Важнымі аспектамі дасягнення такіх вынікаў з’яўляюцца збалансаванае кармленне і якасныя кармы, належны догляд за жывёлай, якасная работа ветэрынарнай і заатэхнічнай службаў.

Як вядома, немалаважная роля ў стабільнай і прыбытковай рабоце жывёлагадоўчай галіны належыць ветурачу і тэхніку-асемянатару. І любы пралік у рабоце можа стаць крытычным. На дадзены момант у сельгасфіліяле ветурачом працуе малады спецыяліст Вольга Крупінская. Кіраўніцтва задаволена яе адказным стаўленнем да сваёй справы. Добрых слоў заслугоўваюць і тэхнікі-асемянатары Надзея Стрынадка і Дзмітрый Андрыеўскі. Менавіта ад гэтых спецыялістаў у большасці сваёй залежыць колькасць атрыманых цялят, а значыць, і будучыя высокія надоі. Сёлета чыгірынскія жывёлаводы “плюсуюць” па колькасці атрыманых цялят.
Малочная і, наогул, жывёлагадоўчая галіна СГФ “Чыгірынка” ўпэўнена рухаецца наперад. І для гэтага ёсць тут усё неабходнае – добрая кармавая база, адказныя работнікі і спецыялісты, а галоўнае – моцнае жаданне калектыву ўтрымліваць дасягнутае і працаваць над далейшым развіццём гаспадаркі.

Подробно в номере № 30 (10652).

Людміла СЯМЁНАВА.
Фота аўтара.