Менавіта так акрэсліла сутнасць работы ў галіне сацыяльнай абароны Ірына Пятроўская, намеснік начальніка ўпраўлення па працы, занятасці і сацыяльнай абароне райвыканкама. Напярэдадні прафесійнага свята яе шматгадовая добрасумленная праца высока ацэнена – Ганаровай граматай Міністэрства працы і сацыяльнай абароны Рэспублікі Беларусь.

Разважаючы аб якасцях, якімі павінен валодаць сацработнік, Ірына Аляксандраўна адзначыла: “Сацыяльны работнік – гэта спецыяліст, які аказвае бытавую, прававую і маральную дапамогу тым, каму яна патрэбна, а дакладней, пенсіянерам, інвалідам, сіротам, мнагадзетным сем’ям, бежанцам. Прадстаўнікоў гэтай прафесіі адрозніваюць такія якасці, як дабрыня, спагадлівасць, уважлівасць, здольнасць да суперажывання. Для таго, каб наша работа была эфектыўнай і карыснай, нам трэба быць стрэсаўстойлівымі, арганізаванымі, стрыманымі і справядлівымі”.

Многія з гэтых якасцяў Ірына Пятроўская выхавала і развіла ў сабе яшчэ ў маладосці, калі працавала медсястрой рэанімацыйна-анестэзіялагічнага аддзялення цэнтральнай раённай бальніцы. З 2000 года і да сённяшняга дня прафесійны лёс Ірыны Аляксандраўны непарыўна звязаны з галіной сацыяльнага абслугоўвання жыхароў Кіраўшчыны. Пачынала з пасады загадчыка аддзялення сацыяльнай дапамогі дома раённага цэнтра сацыяльнага абслугоўвання насельніцтва, затым была вядучым спецыялістам па сацыяльна-бытавых пытаннях упраўлення па працы, занятасці і сацыяльнай абароне райвыканкама, галоўным спецыялістам, начальнікам аддзела сацабароны, з 2015 года займае цяперашнюю пасаду. Аналізуючы працоўны шлях Ірыны Пятроўскай, можна ўбачыць, што яна прайшла амаль па ўсіх ступенях кар’ернай лесвіцы, а значыць мае багаты вопыт і карысныя напрацоўкі, што пацвярджаецца вынікамі яе работы.

Для таго, каб выконваць работу аператыўна і эфектыўна, яна цесна ўзаемадзейнічае з аддзеламі райвыканкама, раённымі службамі, грамадскімі фарміраваннямі, сродкамі масавай інафармацыі. Удзельнічае ў прамых тэлефонных лініях, выязных прыёмах па пытаннях прадастаўлення і льгот і сацыяльных гарантый грамадзянам.

Напярэдадні прафесійнага свята Ірына Пятроўская выказала пажаданне, каб кожны, хто шукае дапамогі, атрымліваў яе ў поўнай меры. “Няхай наша штодзённая праца дорыць грамадзянам надзею і ўпэўненасць у заўтрашнім дні!”, – падвяла вынік гутаркі гераіня гэтых радкоў.

Яўгенія БЯЛЬКО.

Фота Аляксандра ХАХЛОВА.