Спартыўны сцяг Кіраўшчыны – у надзейных руках!
Сярод устаноў дадатковай адукацыі пераможцам раённага спаборніцтва па выніках 2020 года прызнана ДСУСУ “Кіраўская спецыялізаваная дзіцяча-юнацкая спартыўная школа алімпійскага рэзерву”.
Нягледзячы на неспрыяльную эпідэмічную сітуацыю, якая “разыгралася” ў свеце напачатку мінулага года і працягваецца, спартсмены Кіраўшчыны сумелі летась падтрымаць слаўныя традыцыі быць хутчэйшымі, мацнейшымі, лепшымі. Магчыма, пры іншых умовах прыхільнікі фізкультурнага руху з нашага раёна маглі б паказаць яшчэ больш высокія рэзультаты. Але і тое, што было зроблена, заслугоўвае самых добрых слоў, павагі і гонару. Зноў выдатна праявілі сябе цяперашнія і былыя выхаванцы СДЮШАР, якія паказалі высокі клас і падрыхтоўку на спаборніцтвах высокага ўзроўню.
Зборныя каманды валейбалістак – выхаванак трэнераў Сяргея Лазаковіча і Тамары Грыгор’евай – вызначыліся адразу трыма бронзавымі ўзнагародамі на абласных спаборніцтвах: дзяўчаты 2003-2004 г.н. – у Алімпійскіх днях моладзі, 2004-2005 г.н. – на Першынстве Магілёўшчыны, а 2006-2007 г.н. – на Спартакіядзе дзіцяча-юнацкіх спартыўных школ.
Выхаванцы аддзялення цяжкай атлетыкі пад кіраўніцтвам трэнераў Кірыла Іваніцкага і Андрэя Асташова таксама заваявалі камандныя медалі: “срэбра” – у Спартакіядзе школьнікаў Магілёўскай вобласці, “бронзу” – у Спартакіядзе ДЮСШ.
Паліна Конрад – адна з яркіх спартыўных зорачак Кіраўшчыны
Зноў пацвердзілі сваю выдатную падрыхтоўку выхаванцы аддзялення веласпорту (трэнеры Юрый Цішкоў, Сяргей Клімовіч і Павел Белахвостаў). Камандам нашых юных велагоншчыкаў не было роўных у Спартакіядзе і Першынстве школьнікаў Магілёўскай вобласці на шашы. Бліснулі майстэрствам і асобныя веласіпедысты. Паліна Конрад заваявала пяць залатых і адзін сярэбраны медаль на некалькіх прэстыжных рэспубліканскіх спаборніцтвах, Раман Тарабуеў узяў два “золаты”.
І нарэшце, небывалых поспехаў летась дабіліся нашы футбалісты. Каманда “Кіраўск-СДЮШАР” (на здымку) па пляжным футболе зрабіла залаты дубль: упершыню ў гісторыі стала чэмпіёнам Рэспублікі Беларусь, а затым і ўладальнікам Кубка краіны!
Уражвае колькасць кіраўскіх спартсменаў, якія летась уключаліся ў саставы нацыянальных зборных Беларусі і паспяхова абаранялі гонар нашай дзяржавы на еўрапейскім і сусветным узроўні: Вадзім Бокач, Юрый Пятроўскі, Арцемій Дрозд, Антон Акуліч, Уладзімір Усціновіч, Канстанцін Магалецкі – у пляжным футболе, Раман Цішкоў, Аксана Салаўёва, Васіль Бяляўскі, Канстанцін Бяляўскі, Ганна Васількова, Марыя Зайцава, Ангеліна Шчарбакова, Паліна Конрад – у веласпорце, Дар’я Лазаковіч, Мікалай Бяляўскі – у цяжкай атлетыцы.
Да кагорты кіраўчан, якія заслужылі высокае званне майстроў спорту, у 2020 годзе дадаліся Арцемій Дрозд, Юрый Пятроўскі і Канстанцін Магалецкі.
Так трымаць, землякі! Спартыўны сцяг Кіраўшчыны – у надзейных руках!
Аляксандр ХАХЛОЎ.