На высокім арганізацыйным узроўні, зладжана праходзіць перыяд зімова-стойлавага ўтрымання грамадскага пагалоўя буйной рагатай жывёлы ў КСУП “Чырвоны баец”. Загадзя і ў дастатку была сфарміравана кармавая база, падрыхтаваны жывёлагадоўчыя памяшканні, прадуманы ўсе іншыя моманты і нюансы. Дадаць да гэтага яшчэ належную працоўную дысцыпліну мясцовых работнікаў, і на выхадзе атрымліваюцца высокія вытворчыя паказчыкі і істотнае фінансавае папаўненне касы сельгасарганізацыі. А ў зімовы перыяд жывёлагадоўля – практычна адзіная крыніца даходаў.

Чырвоны баец” на працягу шэрагу апошніх гадоў стабільна займае адну з лідзіруючых пазіцый у жывёлагадоўчай галіне не толькі ў нашым раёне, але і на Магілёўшчыне. Пацвярджэнне таму – дынаміка росту вытворчых паказчыкаў, што гаворыць аб мэтанакіраванай рабоце ва ўсіх звёнах тэхналагічнага ланцуга.

Не стаў выключэннем і мінулы год. Практычна па ўсіх накірунках назіраецца “плюсавая” тэндэнцыя ў параўнанні з папярэднім годам. Як расказаў галоўны заатэхнік сельгасарганізацыі Віктар Даніленка, за названы перыяд валавы надой малака склаў 7394,8 т, што на 939 т больш, чым у 2022 годзе. Рэалізавана яго 6921,5 т (+998,9 т) – усё выключна гатункам “экстра”. Ад кожнай каровы атрымана па 6708,8 кг малака (+154,7 кг). Адпаведна і ў суткі кожная карова даілася больш прадукцыйна – па 20,7 кг у сярэднім (на 2,43 кг больш, чым у 2022).

Павялічылася ў параўнанні з 2022 годам пагалоўе жывёлы. У агульным статку гаспадаркі зараз 3353 галава БРЖ, больш леташняга паказчыка на 230. У тым ліку дойны статак складае 1140 рагуль. На 110 галоў павялічыўся і прыплод цялят: у 2023 годзе іх атрымана 1394.
Рост паказчыкаў забяспечваецца захаваннем тэхналагічных патрабаванняў на ўсіх этапах работы з жывёлай: вырошчвання, утрымання, кармлення. Загадзя да зімоўкі былі падрыхтаваны цёплыя, утульныя і адначасова светлыя памяшканні, дзе жывёла ўтрымліваецца ў чысціні.
Малако, як гаворыцца, у каровы на языку. У нарыхтоўчы перыяд шчыльна папрацавалі механізатары і спецыялісты. Да стойлавага перыяду ў кармавую “абойму” было закладзена 15 траншэй сенажу і сіласу – пад поўную патрэбу і нават “з гакам”. Зараз кармленне жывёлы забяспечана ў поўным аб’ёме і наладжана згодна тэхналагічнай карты па ўсіх узроставых групах. У сутачны рацыён рагуль уваходзіць кормасумесь, у якую ўключана 24 кг сіласу і 18 сенажу, а таксама 8 кг канцэнтратаў уласнага прыгатавання, бураковыя жамерыны, піўная драбіна. Для цялятак у гаспадарцы маюцца ўсе віды камбікармоў, у тым ліку закуплены КР-1, уласнага прыгатавання КР-2 і КР-3, а таксама кармы з зерневай групы, прэміксы і бялок – усё для росту і належнага развіцця маладняку. Усе віды камбікорму, да слова, абавязкова даследуюцца ў спецыяльнай лабараторыі Бабруйска.

А бадай, самы важны фактар росту прадукцыі жывёлагадоўлі – людскі. Як расказала загадчык МТК “Старыя Дваранінавічы” Ала Саліван, у калектыве фермы працуюць 36 чалавек. Усе работнікі – надзейныя, адказныя і дысцыплінаваныя, да справы ставяцца сур’ёзна і добрасумленна. Старанна працуюць аператары машыннага даення. Лідары па надоях – Ірына Гукава, Валянціна Марцючэнка. Добрых слоў заслугоўвае стаўленне да справы Настассі Крыванос, Святланы Гурыкавай, падменнага аператара Валянціны Талыш. Дарэчы, увесь дойны статак на працягу сутак абслугоўваюць усяго дзве работніцы ў няпростым графіку: першая дойка працягваецца з 6.00 раніцы да 15.00, увечары – з 18.00 да 1.30. А раніцай іх змяняе другая пара аператараў, а першая – адпачывае. На раздойванні кароў пасля ацёлу адказна працуюць Валянцін Лакіза, Ірына Пархімчык.

Па такім жа графіку, што і аператары машыннага даення працуюць і аператары па абслугоўванні даільнай залы – выключна мужчынская брыгада ў саставе Аляксандра Лакізы, Леаніда Каравая, Аляксандра Башана і Аляксандра Малахава.

Належным чынам працуюць на даручаных участках жывёлаводы па вырошчванні маладняку. У ліку лепшых – Алена Цяніцкая, Галіна Здункевіч, Наталля Бяляўская, Андрэй Сарока.

Складаемыя агульнага поспеху не патрабуюць нешта вынаходзіць альбо нейкіх мудрагелістых формул. Яна адна і простая: трэба кожнаму любіць сваю справу і захоўваць усе тэхналагічныя прыёмы.

Аляксандр ХАХЛОЎ. Фота аўтара.