Падарункі ад валанцёраў

“Кіравец” паведамляў чытачам аб дабрачыннай акцыі, ініцыіраванай валанцёрамі грамадскага аб’яднання “Беларускае таварыства Чырвонага Крыжа” Мышкавіцкай СШ, якія напрыканцы года сумесна з ўдзельнікамі харэаграфічнага калектыву “Вера” Мышкавіцкай дзіцячай школы мастацтваў і пры падтрымцы калектыву раённага Дома культуры наладзілі на галоўнай раённай сцэне навагодні дабрачынны вечар. Ён сабраў нямала зацікаўленых гледачоў і прынёс у скарбонку дабрачыннасці раёна каля 3-х мільёнаў рублёў.
У першыя дні новага года гэтая дабрачынная акцыя атрымала свой лагічны працяг: на выручаныя ад вечара сродкі былі набыты навагоднія і калядныя падарункі, з якімі мышкавіцкія валанцёры завіталі да рабят з сацыяльна-няўдачных сем’яў горада, населеных пунктаў раёна, усяго каля 20 адрасоў.
Гаворыць кіраўнік валанцёрскай групы “Алмаз”, намеснік дырэктара Мышкавіцкай СШ па вучэбнай рабоце Наталля Маісеенка: “Галоўным вынікам сваёй работы лічым радасць у вачах дзяцей, іх шчаслівыя ўсмешкі. Праведзеная дабрачынная акцыя дала нам магчымасць падарыць навагодняе і каляднае цуда рабятам, чые бацькі не надта занепакоены душэўным станам і настроем сваіх сыноў і дачок. Мы пастараліся выправіць гэтую несправядлівасць. У цэлым жа вучым рабят-валанцёраў быць чулымі да чужой бяды, прымаць людзей такімі, якія яны ёсць, з іх праблемамі і недахопамі, умець заўважаць тых, каму неабходна падтрымка, і прыходзіць на дапамогу, не чакаючы, калі аб гэтым папросяць. Увага, чуласць і гатоўнасць прыйсці на дапамогу — вось наша крэда.”