Пра выбары і выбар: якім павінен быць дэпутат? (бліц-апытанне жыхароў Кіраўшчыны)
Працягваем цікавіцца ў кіраўчан і жыхароў раёна іх думкамі наконт таго, якім яны бачаць будучага народнага выбранніка.
Аляксандр ЖУРАЎСКІ, старшы інспектар РАНС:
— Дастаткова праглядзець спіс кандыдатаў у дэпутаты абласнога і раённага Саветаў дэпутатаў, каб стала відавочным, што кожны з гэтага спісу — прафесіянал у сваёй справе. І гэта вялікі плюс, бо, працуючы на адказным пасту, можна ўнесці лепту не толькі ў жыццё раёна, але і пасадзейнічаць у вырашэнні надзённых праблем кожнага жыхара. Аднак пры выкананні сваіх дэпутацкіх функцый адной прафесійнай дзейнасцю абмяжоўвацца нельга. Трэба знаць кожнага выбаршчыка сваёй акругі, цікавіцца іх поспехамі і клопатамі. Дэпутацкая работа павінна быць штодзённай, а не ад сустрэчы да сустрэчы.
Абраныя ў мясцовыя Саветы дэпутатаў грамадзяне павінны дапамагаць сваім выбаршчыкам вырашаць іх надзённыя патрэбы, і кожны жадаючы мог звярнуцца да яго і спадзявацца, што атрымае дапамогу. У выбарах я і мае калегі будзем удзельнічаць, выконваючы не толькі свой грамадзянскі абавязак, але і прафесійны — забяспечваць бяспеку ўчасткаў для галасавання. Мы адказныя за бездакорнае выкананне сваіх службовых абавязкаў і ад дэпутатаў чакаем таго ж.
Настасся ФАРЧАНАВА, навучэнка Жыліцкага сельгаскаледжа:
— Дэпутацкі корпус павінен складацца з актыўных і ініцыятыўных людзей, якія будуць ведаць пра ўсё, што адбываецца ў іх акругах, што хвалюе жыхароў. Для гэтага трэба, каб яны былі сярод грамадства, уліваліся ў жыццёвыя праблемы. Важна, каб гэта былі людзі, якія заслужаць давер народа, добрасумленна будуць выконваць свае абавязкі.
Галасаваць я буду ўпершыню, таму для мяне гэта і хвалююча, і адказна. У бліжэйшы час планую больш падрабязна азнаёміцца з інфармацыяй пра кандыдатаў у дэпутаты па сваёй акрузе, каб зрабіць правільны выбар. Ад абранага дэпутата чакаю, вядома ж, увагі да інтарэсаў моладзі. У прыватнасці, мяне хвалюе пытанне працоўнай занятасці ў вольны ад вучобы час. А яшчэ хочацца, каб працягвалася работа па добраўпарадкаванні Кіраўшчыны, і наш край станавіўся яшчэ больш прыгожым.