З нагоды 90-годдзя з дня нараджэння Уладзіміра Караткевіча, класіка беларускай літаратуры – пісьменніка, публіцыста, паэта, перакладчыка, драматурга, сцэнарыста, у кожнай установе ДУК “Сетка бібліятэк Кіраўскага раёна” былі праведзены тэматычныя мерапрыемствы. Аб гэтым паведаміла бібліятэкар аддзела бібліятэчнага маркетынгу цэнтральнай бібліятэкі г.Кіраўска Ірына РУДАК.

Аформлены кніжныя выставы-дыскусіі “Чытаем разам”, выставы-агляды “Сусвет Уладзіміра Караткевіча”, “Рамантычны рыцар чалавецтва” і іншыя, якія сталі выдатнай рэкламай зборнікаў для чытання. Гэта свайго роду акцыя па прыцягненні юных чытачоў да кнігі і чытання.
Адбыліся мерапрыемствы, прымеркаваныя да дня нараджэння паэта. Так, у Дабаснянскай сельскай бібліятэцы падрыхтавалі літаратурны партрэт “Са сваім поглядам на жыццё”. Удзельнікі з цікавасцю слухалі інфармацыю пра жыццёвы і творчы шлях Уладзіміра Караткевіча. Вучні дзявятых класаў падрыхтавалі і прадэкламавалі ўрыўкі з твораў пісьменніка, з якімі раней пазнаёміліся ў школе. Бібліятэкар Галіна Калікіна правяла бібліяграфічны агляд літаратуры “Сіла бязмежнага таленту” і прэзентацыю “Творчасць, народжаная душой”. У ходзе мерапрыемства гучалі песні, у аснову якіх былі пакладзены паэтычныя радкі Уладзіміра Караткевіча. Тэксты некаторых песень вучні ўжо ведалі і падпявалі выканаўцам.
Цэнтральная бібліятэка прапанавала сваім чытачам выставу-знаёмства “Быў. Ёсць. Буду”. Яе матэрыялы знаё- мяць з жыццём і багатай творчай спадчынай літаратара. Прыхільнікі яго творчасці могуць пазнаёміцца з класікай аўтара: “Каласы пад сярпом тваім”, “Дзікае паляванне караля Стаха” і іншымі празаічнымі творамі, а таксама паэтычнымі зборнікамі. Выставу дапаўня- юць цікавыя старонкі біяграфіі, водгукі сяброў і калег пісьменніка, партрэты аўтара, фотадакументы.
У дзіцячай бібліятэцы-філіяле кожны чытач меў магчымасць пазнаёміцца з творамі пісьменніка на выставе “О, любоў мая, Беларусь!”. Супрацоўнікамі быў падрыхтаваны відэаагляд “Жыццё – калыска творчасці”, у якім прадстаўлены самыя вядомыя творы пісьменніка, матэрыялы пра яго жыццё. Відэаагляд размешчаны ў сацыяльных сетках Одноклассники, ВКонтакте ў групе “Детская библиотэка-филиал”.
Хочацца адзначыць, што пастаянны чытач дзіцячай бібліятэкі-філіяла В.П.Лук’янава, якая знахо- дзіцца на заслужаным адпачынку, зноў перачытала творы У.С.Караткевіча. Па словах Валянціны Паўлаўны, ёй падабаецца, як аўтар апісвае прыроду, побыт і жыццё людзей.
У Жыліцкай сельскай бібліятэцы-філіяле праведзена прэзентацыя-знаёмства “Сабе я выбраў гэты лёс”, у якой было падкрэслена, што ў кожнага – свой Уладзімір Караткевіч. Наведавальнікі ўбачылі шмат рэдкіх фатаграфій і папоўнілі свае веды пра літаратара. Гэтаму садзейнічала і віктарына.
Найвялікшая каштоўнасць усяго, што напісаў аўтар, – у тым, што яго творы выхоўваюць патрыятычныя пачуцці, вучаць лепш разумець наша мінулае і сучаснае.
Галоўнай мэтай мерапрыемстваў было набліжэнне Уладзіміра Караткевіча да чытачоў, выхаванне гонару, павагі, любові да Беларусi, да сваёй нацыi.