На нядаўнім пасяджэнні райвыканкама яго старшыня Аляксандр Бутараў уручыў старшыні праўлення Кіраўскага райспажыўтаварыства Святлане Сарока Ганаровую грамату раённага выканаўчага камітэта за шматгадовую добрасумленную працу ў сістэме спажывецкай кааперацыі і ў сувязі з 50-годдзем з дня нараджэння.
Сістэме гандлю Святлана Рыхардаўна прысвяціла ўсё свядомае жыццё. У свой час яна закончыла Гомельскі кааператыўны тэхнікум Белспажыўтаварыства, а пазней — Гомельскі кааператыўны інстытут, набыўшы спецыяльнасць “таваразнаўства нехарчовымі таварамі, таваразнаўства і арганізацыя гандлю нехарчовымі таварамі”. Працоўную біяграфію пачала таваразнаўцам Любоніцкага спажыўтаварыства. У розныя гады была загадчыкам магазіна в.Дубцы (з гэтай вёскі, дарэчы, яна родам), намеснікам дырэктара праўлення па гандлю Баравіцкага спажыўтаварыства, намеснікам дырэктара ўнітарнага аптова-рознічнага гандлёвага прадпрыемства “Каапгандаль”, дырэктарам размеркавальных складоў райспажыўтаварыства, выконвала абавязкі намесніка дырэктара, а з 2013 года — узначаліла калектыў і на гэтай пасадзе працуе дагэтуль.
Пад яе кіраўніцтвам калектыў дабіваецца добрых паказчыкаў у працы, арганізацыя стабільна развіваецца. Усе, хто ведаюць Святлану Рыхардаўну, зыходзяцца ў меркаваннях, што ёй уласцівы самыя лепшыя якасці кіраўніка: прынцыповасць, дзелавітасць, высокая арганізаванасць, прафесіяналізм, адказнае стаўленне да даручанай справы, здольнасць адпавядаць сучасным патрабаванням.