Урачысты і прыемны момант азнаменаваў пачатак чарговага пасяджэння райвыканкама: кіраўнік раёна Міхаіл Гулы шчыра павіншаваў з 45-годдзем з дня нараджэння начальніка філіяла КУП “Магілёўаблдарбуд” ДРБУ №197 Віталя Токарава і ўручыў яму з гэтай нагоды, а таксама за шматгадовую і бездакорную працу ў галіне дарожнага будаўніцтва раёна Ганаровую грамату райвыканкама. Словы віншаванняў выказала старшыня раённага Савета дэпутатаў Галіна Слабоднікава. Яна адзначыла асабісты важкі ўклад Віталя Сяргеевіча ў развіццё дарожнай інфраструктуры, умацаванне эканомікі раёна, росту аўтарытэту ўзначальваемай ім арганізацыі, і ўручыла юбіляру Падзячнае пісьмо райсавета.

В. С. Токараў з кагорты тых людзей, для якіх служэнне роднаму краю, – найлепшая ўзнагарода. Нарадзіўся і вырас у Кіраўску, пасля школы паступіў і паспяхова закончыў Магілёўскі машынабудаўнічы інстытут. На малую радзіму вярнуўся маладым спецыялістам. Прафесійны і кар’ерны рост Віталь Токараў пачынаў з пасады майстра па рамонту і ўтрыманню аўтамабільных дарог ДРБУ №197 г.Кіраўска. Потым працаваў тут прарабам, выконваючым абавязкі галоўнага інжынера. У 2003 годзе быў зацверджаны на пасаду галоўнага інжынера, а праз восем гадоў узначаліў калектыў філіяла КУП “Магілёўаблдарбуд” ДРБУ №197.
За 23 гады работы калектыў ДРБУ стаў для В.С.Токарава па-сапраўднаму родным. Менавіта тут прайшло яго прафесійнае і асобаснае станаўленне. І зараз Віталя Сяргеевіча ў раёне і за яго межамі ведаюць і паважаюць як граматнага і кампетэнтнага спецыяліста, умелага кіраўніка, які здолеў згуртаваць калектыў, скіраваць яго патэнцыял на рэзультатыўнае выкананне пастаўленых задач. І найлепшае таму пацвярджэнне — стабільнае развіццё, працоўныя поспехі дарожнай арганізацыі.