У гэтыя дні выхаванцы аддзялення веласпорту Кіраўскай СДЮШАР знаходзяцца ў Магілёве. Тут праходзяць самыя галоўныя спаборніцтвы для юных велагоншчыкаў — абласная спартакіяда школьнікаў.

Старшы трэнер па веласпорту Юрый Цішкоў і трэнер Павел Белахвостаў даюць устаноўку перад стартам лепшай на бягучы момант велагоншчыцы ў рэспубліцы ў сваім узросце Паліне Конрад і аднаму з найбольш перспектыўных сённяшніх выхаванцаў аддзялення веласпорту СДЮШАР Антону Гарачкову

Мэта, з якой адправіліся нашы спартсмены на чарговыя старты, толькі адна — перамога! А іншай быць і не можа. Кіраўская школа веласіпеднага спорту даўно заваявала статус флагмана ў Магілёўскай вобласці. Выхаванцы СДЮШАР з ніводных абласных спаборніцтваў не вяртаюцца дадому без заваяваных прызавых месцаў, часцей за ўсё — першых. Акрамя таго, нашы велагоншчыкі з гонарам прадстаўляюць Прыдняпроўскі край на рэспубліканскім узроўні.

Мінулы год не быў выключэннем у плане спартыўных перамог. Кіраўчане сталі першымі ў абласной спартакіядзе школьнікаў, абласной спартакіядзе сярод ДЮСШ на шашы і на трэку, Алімпійскіх днях моладзі. Радуюць нашы веласіпедысты сваімі выступленнямі і ў асабістым заліку.
Дасягненні не прыходзяць самі па сабе. За імі стаіць карпатлівая работа як саміх рабят, так і іх трэнераў. Юрый Цішкоў працуе з рабятамі ўжо 35 год. За гэты час ён падрыхтаваў шмат спартсменаў. Ёсць сярод іх і тыя, хто трапіў у вялікі спорт, і сёння бліскуча выступае нават на міжнароднай арэне. 12 гоншчыкаў з Кіраўшчыны на бягучы момант уваходзяць у розныя саставы нацыянальнай зборнай Беларусі, а двое — у асноўны, самага высокага рангу.

Расце і трэнерская змена. Юрый Георгіевіч перадае вопыт свайму маладому калегу Паўлу Белахвоставу, які калісьці сам займаўся на аддзяленні веласпорту, а цяпер працуе разам са сваім настаўнікам. Прычым вельмі паспяхова, аб чым сведчыць той факт, што ён прызнаны “Лепшым па прафесіі” ў сферы фізічнай культуры, спорту і турызму ў штогадовым спаборніцтве сярод галін народнай гаспадаркі раёна за 2018 год.

Аляксандр ХАХЛОЎ.

Фота аўтара.