Гераічнымі дарогамі вызвалення Кіраўшчыны
У мінулую суботу ў а/г Мышкавічы завяршыўся велапрабег у межах акцыі “За здароўем — на веласіпедзе!”, прысвечаны 70-годдзю вызвалення Рэспублікі Беларусь ад нямецка-фашысцкіх захопнікаў. З гэтай нагоды ў музеі СВК “Рассвет” імя К.П.Арлоўскага адбылося ўрачыстае мерапрыемства з удзелам вяскоўцаў, моладзі, педагогаў і вучняў мясцовай школы.
Лампаду з Агнём Славы і памяці герояў у апошні з 13 сельскіх населеных пунктаў раёна, на тэрыторыі якіх праводзіўся велапрабег, даставілі прадстаўнікі а/г Паўлавічы. Старшыня Паўлавіцкага сельскага Савета дэпутатаў Жанна Камінская перадала яе маладому пакаленню ардэнаноснай гаспадаркі і заклікала юнакоў і дзяўчат працягваць слаўныя традыцыі дзедаў і прадзедаў, ніколі не забываць тых жудасных выпрабаванняў, якія выпалі на лёс людзей старэйшага пакалення, а таксама пастаянна агортваць ветэранаў Вялікай Айчыннай вайны клопатам і ўвагай.
Затым да прысутных звярнуўся старшыня Мышкавіцкага сельскага Савета дэпутатаў Віталь Глекаў, які нагадаў падзеі далёкага 1943 года, калі бамбёжкам, масавым арыштам, аблавам паралельна з іншымі населенымі пунктамі сельсавета былі падвергнуты і Мышкавічы. То быў складаны перыяд акупацыі, калі гітлераўцы нанеслі значныя страты мясцовай гаспадарцы і сяльчанам. Таму самым незабыўным і радасным для людзей старэйшага пакалення стаў дзень вызвалення ад ненавіснага ворага.
Падчас мерапрыемства адзначалася, што гэтыя дні праходзяць у “Рассвеце” пад знакам слаўнага юбілею — 70-годдзя з дня ўтварэння сельгаспрадпрыемства. У старонкі яго летапісу ўпісаны прозвішчы многіх землякоў, якія сваімі ратнымі і працоўнымі подзвігамі праславілі родную гаспадарку: Герой Савецкага Саюза і Сацыялістычнай Працы К.П.Арлоўскі, двойчы Герой Сацыялістычнай Працы В.К.Старавойтаў, Героі Сацыялістычнай Працы В.І.Баркоўская, Е.П.Дрозд, Г.П.Елісеенка, Ф.Ф.Кісялёва, Х.Ц.Міхнёва, узнагаро-джаныя ордэнам Леніна І.Л.Барышчык, Н.Я.Бяляўская, Н.К.Бяляўская, М.С.Дамарод, В.П.Корзун, Л.С.Корзун, Ф.А.Скудная, поўны кавалер ордэна Працоўнай Славы Л.Н.Палевіч і інш.
Увага прысутных прадстаўнікоў маладога пакалення была звернута на тое, каб яны пастаянна помнілі аб людзях, хто, не шкадуючы ўласнага жыцця, вызваляў родны край ад нямецка-фашысцкіх захопнікаў, набліжаў доўгачаканую свабоду і незалежнасць, а таксама аб слаўных земляках, якія сваёй добрасумленнай і стараннай працай уносілі важкі ўклад у развіццё і станаўленне гаспадаркі.
Для прысутных была падрыхтавана канцэртная праграма, асноўнымі нумарамі якой былі вершы і песні на ваенную тэматыку.
Памяць аб загінуўшых абаронцах Мышкавіч, усяго нашага раёна і рэспублікі, якія не дажылі да таго светлага дня, калі ўвесь савецкі народ святкаваў перамогу над нямецка-фашысцкімі захопнікамі, была ўшанавана мінутай маўчання.
Затым адбыўся велапрабег па галоўнай вуліцы аграгарадка.