Кіраўчане прынялі ўдзел у абласной прафсаюзнай спартакіядзе работнікаў аграпрамысловага комплексу ў Горках

24 марта 2026 9:31

Кіраўчане прынялі ўдзел у абласной прафсаюзнай спартакіядзе работнікаў аграпрамысловага комплексу ў Горках

У спартыўным комплексе Беларускай дзяржаўнай сельскагаспадарчай акадэміі ў Горках прайшла традыцыйная абласная прафсаюзная спартакіяда работнікаў аграпрамысловага комплексу.

Удзел у ёй прыняло 20 каманд. Спартыўная дружына аграрыяў Кіраўскага раёна, якую ўзначальваў старшыня райкама раённай прафсаюзнай арганізацыі Беларускага прафсаюза работнікаў АПК Віктар Ставер, таксама прыняла ўдзел у спартакіядзе і паказала дастойны рэзультат – трэцяе агульнакаманднае месца.

Віктар Ставер расказаў: «Спаборніцтвы праходзілі па сямі відах спорту. У праграме былі прадстаўлены як традыцыйныя дысцыпліны, такія як міні-футбол, плаванне, тэніс і стральба, так і больш спецыфічныя, якія патрабуюць асаблівай сілы і спрыту – гіравы спорт, дартс, перацягванне канату. Лепшыя вынікі мы паказалі ў гіравым спорце, тэнісе і стральбе.

Спартакіяда прайшла ў лепшых традыцыях прафсаюзнага руху: пазітыўна і з карысцю для здароўя.
Спорт аб’ядноўвае людзей, загартоўвае характар і ўмацоўвае дух. Заняткі фізічнай культурай дапамагаюць падтрымліваць здароўе, фарміруюць упэўненасць у сваіх сілах. У гэтыя дні, калі аграрыі прыступілі да новага сельскагаспадарчага сезона, фізічная актыўнасць і камандны дух асабліва важныя».