Адкрытае першынство раёна па валейболе “Кубак Дружбы-2016” прайшло з 26 па 28 жніўня на базе ліцэя №15. У ім прынялі ўдзел каманды Кіраўскай, Маладзечанскай, Бабруйскай дзіцяча-юнацкіх спартыўных школ, Віцебскай спецыялізаванай ДЮСШ алімпійскага рэзерву, Цэнтра дзіцячай творчасці “Прамень” г.Шклова.

Падчас урачыстага адкрыцця спаборніцтваў іх удзельнікаў вітала намеснік старшыні райвыканкама Таццяна Бяляўская. Яна адзначыла, што Кіраўшчына ўжо даўно стала базай для правядзення спартыўных спаборніцтваў рознага ўзроўню і назвала прыклады самых вядомых з іх.
Наш раён заўжды меў дастойныя рэзультаты ў футболе, веласпорце, цяжкай атлетыцы. А нашы валейбалісты, падкрэсліла Таццяна Бяляўская, па праву сталі візітнай карткай спартыўнага Кіраўска. На працягу апошніх 10 год каманда раёна паспяхова іграе ў Рэспубліканскай дзіцяча-юнацкай валейбольнай лізе, неаднаразова выходзіла пераможцай і прызёрам. Валейбалісты дастойна прадстаўляюць Кіраўшчыну на міжнародных турнірах. А ў 2012 годзе каманда дзяўчат стала бронзавым прызёрам спартакіяды Саюзнай дзяржавы “Алімп”.
У саставе зборных каманд вобласці нашы валейбалісткі неаднаразова станавіліся сярэбранымі і бронзавымі прызёрамі першынства Рэспублікі Беларусь па валейболе, пераможцамі Рэспубліканскай спартакіяды школьнікаў.
Каманда дзяўчат ДЮСШ з’яўляецца неаднаразовым пераможцам абласных спартакіяд школьнікаў, ДЮСШ, “Каласок”, Алімпійскіх дзён моладзі.
У састаў маладзёжнай каманды Рэспублікі Беларусь па валейболе ўваходзяць выхаванкі ДЮСШ Веалета Бяляўская і Крысціна Ермалаева. Сярод лепшых выпускнікоў ДЮСШ — Валерыя Жданава, Анастасія Панасенка, Кацярына Сушко, Вікторыя Ганчаронак, Яўгенія Бяржаніна, Юлія Шырокая.
На завяршэнне прамовы Таццяна Бяляўская пажадала ўдзельнікам першынства “Кубак Дружбы-2016” спартыўных поспехаў, а перамогі — мацнейшым.
Усім камандам былі ўручаны памятныя сувеніры.
Упартая барацьба на валейбольнай пляцоўцы на працягу трох дзён вызначыла дастойных. Зноў сваё спартыўнае ўменне і майстэрства пацвердзілі нашы дзяўчаты: яны занялі першае месца і заваявалі Кубак Дружбы-2016! На другім месцы — каманда з г.Віцебска, на трэцім — з г.Маладзечна.
Кубак, дыпломы адпаведных ступеней, медалі ўдзельнікам каманд падчас закрыцця спаборніцтваў уручыла Таццяна Бяляўская. Лепшым удзельнікам каманд былі уручаны прызы ад ДЮСШ. Адзін з прызоў атрымала Анастасія Панасенка з кіраўскай каманды.
Лепшых ігракоў каманд узнагародзіў прызамі ад філіяла ААТ “Белаграпрамбанк” — Магілёўскае абласное ўпраўленне яго начальнік Андрэй Горбель. Дарэчы, ААТ “Белаграпрамбанк” з’яўлялася генеральным спонсарам нацыянальнай алімпійскай зборнай каманды Рэспублікі Беларусь на Алімпійскіх гульнях у Рыа-дэ-Жанейра.
З каманды кіраўчанак прызоў “Белагра-прамбанка” былі ўдастоены Крысціна Ермалаева і Веалета Бяляўская.
У ліку спонсараў выступіла таксама ВУП “Аўтатэхпартнёр”.
Арганізатарамі першынства былі аддзел адукацыі, спорту і турызму райвыканкама, Кіраўская ДЮСШ, фізкультурна-спартыўны клуб раёна.
Віншуем нашых валейбалістак і іх трэнера Сяргея Лазаковіча з чарговым заслужаным поспехам і жадаем новых перамог!
Наталля ХАДАКОВА.
Фота
Максіма МІКЕШЫНА.