1 Мая адбыўся традыцыйны лёгкаатлетычны крос, прысвечаны Святу працы, Дню Перамогі, на Кубак раённай газеты “Кіравец” і прызы прафсаюзных арганізацый.
Сёлета паспрачацца за званне самага спрытнага прыбылі спартсмены-аматары з 14-ці працоўных калектываў раёна — больш за 100 чалавек.

Удзельнікаў і балельшчыкаў спартыўнага свята вітала галоўны рэдактар раённай газеты “Кіравец” Наталля Хадакова. Яна павіншавала са Святам працы, з надыходзячай знамянальнай датай — 70-годдзем Перамогі савецкага народа ў Вялікай Айчыннай вайне, а таксама выказала ўсім удзячнасць за актыўны ўдзел у традыцыйным лёгкаатлетычным кросе і задавальненне тым, што рады прыхільнікаў здаровага ладу жыцця пашыраюцца.
Далей быў дадзены старт забегам.
Мужчынам розных узроставых катэгорый неабходна было пераадолець дыстанцыю даўжынёй у 1,5 км, жанчынам — 1 км. Барацьба за першынство была заўзятай. Але сюрпрызаў у агульнакамандным заліку яна не паднесла: перамогу ў сёмы раз(!) запар заваявала дружная каманда СВК “Рассвет” імя К.П.Арлоўскага, і пераходны Кубак раённай газеты “Кіравец” зноў адправіўся ў Мышкавічы.
Другое і трэцяе месцы занялі адпаведна каманды Жыліцкага сельгаскаледжа і райаграпрамтэхзабеспячэння.
Каманды-пераможцы былі ўзнагароджаны дыпломамі раённай газеты “Кіравец”.
У асабістым заліку прызавыя месцы размеркаваліся наступным чынам (у мужчын і жанчын): ва ўзроставай катэгорыі 14—17 гадоў — Іван Сімановіч (Жыліцкі сельгаскаледж), Кірыл Шамедзька (СВК “Добасна-агра”) і Дзяніс Лазаковіч (СШ №1); Вікторыя Рыбакова (сельгаскаледж), Дар’я Дзямешка (гімназія) і Дзіяна Завяршынская (СШ №1); 18—29 гадоў — Яўген Манько (СВК “Рассвет” імя К.П.Арлоўскага), Дзмітрый Сяргейчык (СВК “Чырвоны баец”) і Аляксандр Акуліч (РАПТЗ); Вера Каліноўская і Ірына Пінчук (сельгаскаледж), Дзіяна Па-шчанка (СВК “Рассвет” імя К.П.Арлоўскага), Гульнара Барадзіна (ПМК-255); 30— 44 гады — Вячаслаў Каранкевіч (РАУС), Яўген Пішчалін (СВК “Рассвет” імя К.П.Арлоўскага), Юрый Завяршынскі (ПМК-255); Алена Шалыгіна (СВК “Рассвет” імя К.П.Арлоўскага), Ганна Бяляўская (РАПТЗ), Вольга Макаронак (сельгаскаледж); 45-54 гады — Сяргей Лянкевіч (СВК “Рассвет” імя К.П.Арлоўскага), Уладзімір Грамыка (РАПТЗ), Анатоль Рышкевіч (Скрыпліцкі сельскі Савет); Вера Гаўрылава (СВК “Рассвет” імя К.П.Арлоўскага), Святлана Мелішчэня (ПМК-255),Таццяна Шчэрбіч (аддзел адукацыі, спорту і турызму райвыканкама).
Мужчынам і жачынам, якія спрачаліся ва ўзроставай катэгорыі 55 гадоў і старэй, неабходна было пераадолець дыстанцыю ў 0,7 км. Лепшы вынік у жанчын паказала пастаянная ўдзельніца кросу Кацярына Яскевіч з каманды СВК “Рассвет” імя К.П.Арлоўскага, на другім месцы — Галіна Міхалап з ліцэя №15.
І ўпершыню за ўсю гісторыю правядзення гэтага лёгкаатлетычнага кросу адразу тры прадстаўнікі моцнай паловы чалавецтва ва ўзроставай катэгорыі 55 гадоў і старэй сталі першымі: Анатоль Клімовіч (СВК “Рассвет” імя К.П.Арлоўскага),Уладзімір Цішкоў і Уладзімір Пракопчык (Жыліцкі сельгаскаледж).
Усе спартсмены-аматары былі ўзнагароджаны каштоўнымі падарункамі раённага аб’яднання арганізацый прафсаюзаў.
Трое ўдзельнікаў кросу атрымалі сертыфікаты на квартальную падпіску на раённую газету “Кіравец». Сярод іх — сям’я Завяршынскіх, якая прыняла ўдзел у спаборніцтвах у поўным саставе — бацькі і дзве дачкі, актыўны няштатны аўтар “раёнкі” Вячаслаў Каранкевіч і самы старэйшы ўдзельнік спаборніцтваў Уладзімір Пракопчык. Падпіску на “Кіравец” атрымаў і старшыня ФСК Валерый Цыбульскі за належную арганізацыю спартыўнага свята і актыўнае супрацоўніцтва з раённай прэсай.
Трэба адзначыць, што кіраўчанам і гасцям горада ў гэты першамайскі дзень сумаваць не давялося: кожны меў магчымасць знайсці сабе занятак па душы. Каля РДК малышы разам са сваімі бацькамі з задавальненнем малявалі на асфальце, скакалі на вялізных шарах, спявалі і гучнымі апладысментамі сустракалі герояў лялечнага спектакля.
Дзень Першамая стаў на Кіраўшчыне па-сапраўднаму святам здаровага ладу жыцця. Для аматараў футбола на стадыёне ДЮСШ разгарнуліся “гарачыя” спартыўныя баталіі.
Першымі ў спаборніцтва за званне мацнейшай уступілі каманды аматараў футбола сярод дзяўчынак. Ва ўпартай барацьбе перамогу заваявалі прадстаўніцы а/г Скрыпліца, на другім месцы — кіраўчанкі, на трэцім — каманда з Любоніч. Варта адзначыць, што ўсе дзяўчаты — выхаванкі трэнера Кірыла Сцерлінгава.
Сапраўдны мужчынскі футбол з усплёскам эмоцый прадэманстравалі удзельнікі спаборніцтваў па міні-футболе ў залік спартакіяды сярод аграгарадкоў раёна. Удзел у гульнях прыняло 5 каманд. Трэба сказаць, што футбалісты-аматары выкладваліся на ўсю моц, аднак перамогу літаральна “вырвалі” ў сапернікаў прадстаўнікі каманды з а/г Мышкавічы: яны сталі ўладальнікамі Кубка і дыплома першай ступені. На другім месцы — каманда а/г Барчыцы, на трэцім — а/г Добасна, усе былі ўзнагароджаны дыпломамі прызёраў.
Людміла
СЯМЁНАВА.